സംസ്ഥാന പാതയോരത്ത് കുയിലൂരിൽ മുറിച്ചിട്ട മരങ്ങൾ അപകട ഭീഷണി

ഇരിക്കൂർ ∙ സംസ്ഥാനപാതയോരത്ത് മുറിച്ചിട്ട മരങ്ങൾ അപകടങ്ങൾക്കു കാരണമാകുന്നു. തളിപ്പറമ്പ്-ഇരിട്ടി സംസ്ഥാനപാതയിൽ കുയിലൂർ പെട്രോൾ പമ്പിനു സമീപമാണ് മരക്കഷണങ്ങൾ അപകടാവസ്ഥയിൽ കിടക്കുന്നത്. 2 വർഷം മുൻപ് കാറ്റിൽ കടപുഴകിയ കൂറ്റൻ മരങ്ങൾ അഗ്നിരക്ഷാ സേനയുടെ നേതൃത്വത്തിലാണ് മുറിച്ചത്.ഇത് നീക്കം ചെയ്യാതെ മരത്തിന്റെ കൂറ്റൻ ഭാഗങ്ങൾ റോഡിന്റെ ഇരു വശങ്ങളിലും കൂട്ടിയിട്ടിട്ടുണ്ട്. ഇതുകാരണം കാൽനട യാത്രികർ റോഡിലൂടെ പോകേണ്ട സ്ഥിതിയാണ്.  ഇത് അപകടങ്ങൾക്കു കാരണമാകുന്നുണ്ട്. മരക്കഷണങ്ങൾ നീക്കം ചെയ്യണമെന്നാവശ്യപ്പെട്ട് നാട്ടുകാർ പല തവണ ഇരിക്കൂർ പിഡബ്ല്യുഡി അധികൃതരെ സമീപിച്ചെങ്കിലും നടപടിയൊന്നും ഉണ്ടായിട്ടില്ല.