എട്ടു വയസ്സുകാരിയെ പീഡിപ്പിച്ച കേസ്: വയോധികന് 21 വർഷം കഠിനതടവ്

തളിപ്പറമ്പ്∙ എട്ടു വയസ്സുകാരിയെ വീട്ടിൽ കയറി പലതവണ പീഡിപ്പിച്ച കേസിൽ വയോധികന് 21 വർഷം കഠിനതടവും 1.56 ലക്ഷം രൂപ പിഴയും വിധിച്ചു. പട്ടുവം മംഗലശ്ശേരി ആശാരി വളവ് പടിഞ്ഞാറെ പുരയിൽ നാരായണ (77) നെയാണ് തളിപ്പറമ്പ് പോക്സോ അതിവേഗ കോടതി ജഡ്ജി ആർ.രാജേഷ് ശിക്ഷിച്ചത്. 

2020 ഓഗസ്റ്റ് 16നും തുടർന്നുള്ള 4 ദിവസങ്ങളിലും പ്രതി പെൺകുട്ടിയെ പീഡനത്തിന് ഇരയാക്കി. പിന്നീട് ഒക്ടോബർ 20ന് പെൺകുട്ടിയുടെ മാതാവ് വീട്ടിലില്ലാത്ത സമയം നാരായണൻ വീട്ടിലെത്തി, പെൺകുട്ടിക്ക് മിഠായി നൽകി പീഡിപ്പിക്കാൻ ശ്രമിച്ചു. ഇത് മാതാവ് കാണുകയായിരുന്നു. 5 വകുപ്പുകളിലായാണ് ശിക്ഷ വിധിച്ചത്. വാദിഭാഗത്തിന് വേണ്ടി സ്പെഷൽ പബ്ലിക് പ്രോസിക്യൂട്ടർ ഷെറി മോൾ ജോസ് ഹാജരായി.