മഴയിൽ മതിൽ ഇടിഞ്ഞു; ഒഴിവായത് വൻ ദുരന്തം

പഴയങ്ങാടി∙ കനത്ത മഴയിൽ പഴയങ്ങാടി താലൂക്ക് ആശുപത്രിയുടെ പ്രവേശന കവാടത്തിനരികിലെ കരിങ്കൽ മതിൽ ഇടിഞ്ഞു. ഇന്നലെ പുലർച്ചെ 3 ഓടെയാണ് മതിൽ ഇടിഞ്ഞത്.ഈ സമയം  ആശുപത്രിയിലേക്ക് രോഗിയേയും കൊണ്ട് പോകുന്ന വാഹനം കടന്നുപോയതിന് തൊട്ടു പിന്നാലെയാണ് മതിലിടിഞ്ഞത്. റോഡിലേക്ക് കരിങ്കൽ ചീളുകൾ തെറിച്ച് വീണു. ഇവ പിന്നീട് നീക്കം ചെയ്തു. മതിലിനോട് ചേർന്ന വലിയ മരം ഉണ്ട്. ഇതിന്റെ വേര് തള്ളിയതാണ് മതിലിടിയാൻ കാരണം.  ആശുപത്രി കവാടത്തിനരികിലുള്ള മതിലിന്റെ ശോചനീയാവസ്ഥ നേരത്തേ മലയാള മനോരമ വാർത്ത നൽകിയിരുന്നു.