150 മീറ്ററോളം ഭാഗത്തെ റോഡ് തോടായി; ഇത് റോഡോ അതോ തോടോ ?

ചിറ്റാരിപ്പറമ്പ്∙ കണ്ണവം ചെറുവാഞ്ചേരി റോഡിൽ 150 മീറ്ററോളം ഭാഗത്തെ റോഡ് തോടായിട്ടും അധികൃതർ നടപടിയെടുക്കുന്നില്ലെന്നു പരാതി. നാലു വർഷം മുൻപ് റോഡ് നവീകരണത്തിന്റെ ഭാഗമായി ഓവുചാലുകൾ പല ഭാഗങ്ങളിലും സ്ഥാപിച്ചിരുന്നു. എന്നാൽ, പൂഴിയോട് റോഡ് മുതൽ ഗണപതി ക്ഷേത്രം വരെയുള്ള ഭാഗങ്ങളിൽ ഓവുചാൽ നിർമാണം പൂർത്തിയായില്ല.

ഇതോടെ മഴക്കാലങ്ങളിൽ റോഡിലൂടെ വെള്ളം പരന്നൊഴുകാൻ തുടങ്ങി. ഇതിനിടയിൽ വൈദ്യുതത്തൂൺ റോഡരികിലെ ഓവുചാലിൽ സ്ഥാപിച്ചു. ഇതോടെ വെള്ളം പൂർണമായും റോഡിലൂടെ ഒഴുകാൻ തുടങ്ങി. വെള്ളവും ചെളിയും  ഇവിടെ കെട്ടിനിൽക്കുന്നതിനാൽ കാൽനട യാത്രയും ദുരിതമായിട്ടുണ്ട്. വാഹനങ്ങൾ പോകുമ്പോൾ ചെളി തെറിക്കുന്നതും പതിവാണ്. ഓവുചാൽ സ്ഥാപിച്ചു പ്രശ്നം പരിഹരിക്കണമെന്നാണു നാട്ടുകാരുടെ ആവശ്യം.