ഉമയംചാലിൽ റോഡരികിൽ കൂട്ടിയിട്ട വൈദ്യുതത്തൂണുകൾ അപകട ഭീഷണി

പുളിങ്ങോം ∙ റോഡരികിൽ ഇറക്കിയിട്ട വൈദ്യുതത്തൂണുകൾ വാഹനങ്ങൾക്കും കാൽനട യാത്രക്കാർക്കും ഭീഷണിയായി മാറി. പുളിങ്ങോം-ജോസ്ഗിരി റോഡിൽ ഉമയംചാൽ ഭാഗത്ത് അശ്രദ്ധമായി ഇറക്കിയിട്ട വൈദ്യുതത്തൂണുകളാണു വാഹനങ്ങൾക്കും കാൽനടയാത്രക്കാർക്കും ഭീഷണിയായത്. വാഹനങ്ങൾ വന്നു വൈദ്യുത തൂണിൽ ഇടിക്കുന്നതും കാൽനട യാത്രക്കാരുടെ കാലുകൾ തട്ടി പരുക്കേൽക്കുന്നതും പതിവാണ്.

തൂണുകൾ റോഡരികിൽ നിന്നു മാറ്റിയിടണമെന്നു ആവശ്യപ്പെട്ടു പഞ്ചായത്ത്അംഗം സിബി എം.തോമസ് കെഎസ്ഇബി അധികൃതർക്ക് പരാതി നൽകി. അധികൃതരുടെ ഭാഗത്തു നിന്നു നടപടികളൊന്നും ഉണ്ടായില്ലെന്നു പഞ്ചായത്ത് അംഗം പറഞ്ഞു. ഒട്ടേറെ ബസുകളും നൂറു കണക്കിനു വാഹനങ്ങളും ദിവസവും കടന്നുപോകുന്ന റോഡിന്റെ അരികിലാണ് അപകടകരമാകും വിധം  തൂണുകൾ കൂട്ടിയിട്ടിരിക്കുന്നത്.