ബോയ്സ് ടൗൺ ചുരം റോഡരികിൽ മൂന്നടിയിൽ കൂടുതൽ ആഴമുള്ള കുഴി; യാത്രക്കാർക്ക് ഭീഷണി

പാൽച്ചുരം ∙ തകർച്ച നേരിടുന്ന ബോയ്സ് ടൗൺ ചുരം റോഡരികിൽ ഉണ്ടായ വലിയ കുഴി വാഹനയാത്രക്കാർക്ക് ഭീഷണിയാകുന്നു. മഴവെള്ളം ഒഴുകിപ്പോകാൻ സൗകര്യം ഇല്ലാത്തതിനെ തുടർന്നാണ് വെള്ളം റോഡിലൂടെ ഒഴുകി ടാറിങ്ങിനോട് ചേർന്നു വലിയ കുഴി ഉണ്ടായത്. ചുരത്തിലെ രണ്ടാമത്തെ ഹെയർപിൻ വളവിലാണ് ഏകദേശം മൂന്നടിയിൽ കൂടുതൽ ആഴമുള്ള കുഴി ഉണ്ടായിട്ടുള്ളത്. വാഹനങ്ങൾ വശം കൊടുക്കുമ്പോഴും ഒരു ഭാഗം ചേർന്ന് പോകുമ്പോഴും കുഴിയിൽ വീഴാനുള്ള സാധ്യത ഏറെയാണ്. റോഡിന്റെ അറ്റകുറ്റ പണികൾ ഉടൻ ആരംഭിച്ചില്ലെങ്കിൽ വയനാട്ടിലേക്കുള്ള യാത്രക്കാർ വലയും.