കരുവഞ്ചാലിൽ മാലിന്യം പുഴയിലേക്ക് ഒഴുക്കുന്നു

കരുവഞ്ചാൽ ∙ പുഴകളിലെ ഒഴുക്ക് നിലയ്ക്കാറായ സമയത്ത് കരുവഞ്ചാൽ ടൗണിലെ ബഹുനില കെട്ടിടത്തിൽനിന്ന് മലിനജലം സമീപത്തെ പുഴയിലേക്ക് ഒഴുകിയെത്തുന്നു. ഇതിനെതിരെ പുഴസംരക്ഷണ സമിതി രംഗത്തെത്തി. ഒട്ടേറെ അതിഥിത്തൊഴിലാളികൾ താമസിക്കുന്ന കെട്ടിടമാണിത്. ഭക്ഷ്യവസ്തുക്കളുടെ അവശിഷ്ടങ്ങളും പ്ലാസ്റ്റിക് സഞ്ചിയും മറ്റും പരിസരത്തേക്കാണ് വലിച്ചെറിയുന്നത്. മഴ പെയ്യുമ്പോൾ ഇവ ഒഴുകി പുഴയിലാണ് എത്തുന്നത്. ഇതുസംബന്ധിച്ച് പരാതി നൽകുമ്പോൾ താൽക്കാലിക പരിഹാരം മാത്രമാണ് ഉണ്ടാകുന്നത്. എന്നാൽ ദിവസങ്ങൾക്കുള്ളിൽ ഇത് ആവർത്തിക്കപ്പെടുന്നു.

ഒഴുക്ക് കുറഞ്ഞ സാഹചര്യത്തിൽ മലിനജലം പുഴയിൽ എത്തുന്നത് പൊതുജനാരോഗ്യത്തിന് ഭീഷണി ഉയർത്തുന്നു. ശുദ്ധജലക്ഷാമം അനുഭവപ്പെട്ടു തുടങ്ങിയതോടെ നൂറുകണക്കിനാളുകൾ കുളിക്കാനും വസ്ത്രങ്ങൾ കഴുകാനും മറ്റുമായി ആശ്രയിക്കുന്ന പുഴയാണിത്. മാലിന്യം തള്ളിയ സംഭവങ്ങളിൽ മലിനീകരണ നിയന്ത്രണ കൺട്രോൾ ബോർഡും, എൻഫോഴ്സ്മെന്റും പഞ്ചായത്തും പലതവണ പരിശോധന നടത്തി പിഴ ഈടാക്കിയതാണ്.