കൊയ്യത്ത് സ്കൂൾ ബസ് മറിഞ്ഞ സംഭവം: 14 പേർ ചികിത്സയിൽ

ശ്രീകണ്ഠപുരം∙ കൊയ്യത്ത് 12ന് രാത്രി കുട്ടികളുമായി ഒരു വിവാഹത്തിന് പോകവേ കൊയ്യം മർക്കസിന്റെ സ്കൂൾ ബസ് മറിഞ്ഞ സംഭവത്തിൽ 14 പേർ ചികിത്സയിൽ തുടരുന്നു.    11 പേർ കണ്ണൂർ എകെജി ആശുപത്രിയിലും, 3 പേർ കോഴിക്കോട് ഗവ. മെഡിക്കൽ കോളജ് ആശുപത്രിയിലും ചികിത്സയിലാണ്. എകെജി ആശുപത്രിയിൽ ചികിത്സയിൽ കഴിയുന്നവരിൽ റാഷിദ്,  അൻസിൽഷാ, മഷ്‌ഹൂദ് എന്നിവർ ഐസിയുവിലാണ്.

ഫാമിൽ, സഫ്‌വാൻ, ജുനൈദ് എന്നിവരാണ് കോഴിക്കോട് മെഡിക്കൽ കോളജ് ആശുപത്രിയിൽ ചികിത്സയിലുള്ളത്. ചികിത്സയിൽ ഉള്ളവരിൽ ഒരുകുട്ടി മാത്രമാണ് കണ്ണൂർ ജില്ലയിൽ നിന്നുള്ളത്. മറ്റുള്ളവർ കോഴിക്കോട്, മലപ്പുറം ജില്ലകളിൽ നിന്നുള്ളവരാണ്. കൊയ്യം മർക്കസ് അധികൃതരും ആശുപത്രിയിൽ തന്നെയുണ്ട്.  ചികിത്സയിൽ കഴിയുന്ന കുട്ടികളെല്ലാവരും അപകടനില തരണം ചെയ്തിട്ടുണ്ട്.