റോഡിൽ കുഴി; യാത്രക്കാർ ദുരിതത്തിൽ

ചെറുപുഴ ∙കരോക്കാട്-സബ് ട്രഷറി റോഡിൽ രൂപപ്പെട്ട കുഴി വാഹനങ്ങൾക്കും കാൽനടയാത്രക്കാർക്കും ദുരിതമാകുന്നു. റോഡിൽ ഗർത്തം രൂപപ്പെട്ടതു പെൻഷൻ വാങ്ങാനെത്തുന്ന വയോജനങ്ങളെ ഉൾപ്പെടെ ഏറെ ദുരിതത്തിലാക്കുന്നു.റോഡിനു വീതി കുറഞ്ഞതിനാൽ വാഹനങ്ങൾക്കു കുഴിയിൽ വീഴാതെ കടന്നുപോകാനാവില്ല. ചെറുപുഴ സഹകരണാശുപത്രിയിലേക്കു പോകുന്നതും ഈ റോഡിലൂടെയാണ്.വീതി കുറഞ്ഞ റോഡിന്റെ ഒരുവശം ജലജീവ മിഷൻ പദ്ധതിയുടെ പൈപ്പിടാനായി പൊളിക്കുകയും ചെയ്തതോടെ കാൽനടയാത്രക്കാർ ഏറെ ബുദ്ധിമുട്ട് അനുഭവിക്കുന്നുണ്ട്. കാലവർഷത്തിനു മുൻപു റോഡ് അറ്റകുറ്റപ്പണി നടത്തി ഗതാഗതയോഗ്യമാക്കണമെന്നാണു നാട്ടുകാരുടെ ആവശ്യം.