തീരദേശത്തിന്റെ സൗന്ദര്യത്തിലേക്ക് കയാക്കിങ് ഒരുങ്ങി

ചീമേനി∙ തേജസ്വനിയ്ക്ക് കുറുകെ ഷട്ടർ കം ബ്രിഡ്ജ് യാഥാർഥ്യമായതോടെ തീരദേശത്തിന്റെ സൗന്ദര്യം ആസ്വദിക്കുവാൻ വൈകുന്നേരങ്ങളിൽ ജന തിരക്കേറി.  നീലേശ്വരം നഗരസഭയും കയ്യൂർ–ചീമേനി പഞ്ചായത്തുമായി ബന്ധിപ്പിക്കുന്ന തരത്തിൽ പാലായി ഷട്ടർ കം ബ്രിഡ്ജ് യാഥാർഥ്യമായതോടെയാണ് പുഴയോരത്തിന്റെ മനോഹാരിത കാണാൻ വൈകുന്നേരങ്ങളിൽ ജനങ്ങൾ കൂട്ടമായി എത്തുന്നത്. കർഷക പോരാട്ടങ്ങൾ കൊണ്ട് ചരിത്രത്തിൽ ഇടം തേടിയ കയ്യൂർ, കൂക്കോട്ട്, പാലായി തുടങ്ങിയ ഗ്രാമങ്ങളുടെ പച്ചപ്പു നിറഞ്ഞ സൗന്ദര്യം ആസ്വദിക്കാനെത്തുന്ന ജനങ്ങൾക്ക് പുഴയിൽ ചെറിയ ബോട്ടുകളിലൂടെ സഞ്ചരിക്കുവാനുള്ള സൗകര്യവും കയാക്കിങ്  സംവിധാനങ്ങളും ഒരുക്കി കൊണ്ട് ടൂറിസം സൊസൈറ്റികളും രംഗത്ത് വന്ന് കഴിഞ്ഞു.  കയ്യൂർ വില്ലേജ് ടൂറിസം ലിമിറ്റഡിന്റെ നേതൃത്വത്തിൽ കയാക്കിങ് പാർക്കിങ് കഴിഞ്ഞ ദിവസം എം.രാജഗോപാലൻ എംഎൽഎ ഉദ്ഘാടനം ചെയ്തു. രാവിലെ 7 മുതൽ വൈകിട്ട്  വരെ പുഴയിലൂടെ കയാക്കിങ് നടത്താനുള്ള പദ്ധതിയാണ് ഒരുക്കിയിട്ടുള്ളത്.