റോഡുകൾക്ക് 6 മാസം പോലും ആയുസില്ല; നിർമാണത്തിലെ അപാകത കണ്ടെത്തി വിജിലൻസും

കാസർകോട് ∙ ജില്ലയിൽ കഴിഞ്ഞ 6 മാസത്തിനുള്ളിൽ പണി പൂർത്തീകരിച്ച റോഡുകളിൽ പലതും പൊട്ടിപ്പൊളിഞ്ഞതായും ചിലയിടങ്ങളിൽ ഉപരിതലം ഇളകിപ്പോയതായും വിജിലൻസ് പരിശോധനയിൽ കണ്ടെത്തി.

ഓപ്പറേഷൻ സരൾ രസ്തയുടെ ഭാഗമായി വിജിലൻസ് ജില്ലയിൽ 6 റോഡുകളാണ് പരിശോധിച്ചത്.വിജിലൻസ് സംഘത്തിൽ അസി. എക്സിക്യൂട്ടീവ് എൻജിനീയർ എ. അനിൽകുമാർ, അസിസ്റ്റന്റ് എൻജിനീയർ വി.എസ്.സുദർശൻ, എഎസ്ഐമാരായ വി.എം.മധുസൂദനൻ, വി.സതീശൻ, വി.ടി.സുഭാഷ് ചന്ദ്രൻ, സീനിയർ സിവിൽ പൊലീസ് ഓഫിസർമാരായ പി.കെ.രഞ്ജിത് കുമാർ, പി.വി.സന്തോഷ്, കെ.വി.ജയൻ, വി.എം. പ്രദീപ് കുമാർ , കെ.വി.ശ്രീനിവാസൻ,  കെ.രതീഷ് എന്നിവരുമുണ്ടായിരുന്നു.

പരിശോധിച്ച റോഡുകൾ

ഡിവൈഎസ്പി കെ.വി.വേണുഗോപാലിന്റെ നേതൃത്വത്തിൽ കോടോം ബേളൂർ പഞ്ചായത്തിൽ ജില്ലാ പഞ്ചായത്ത് ചെയ്ത എഴാം മൈൽ-എണ്ണപ്പാറ റോഡ്, പിഡബ്ല്യുഡി റോഡുകളായ ആനകല്ല്-പൂക്കയം-മാലക്കല്ല് റോഡ്, ചാലിങ്കാൽ- വെള്ളിക്കോത്ത് റോഡ് എന്നിവയാണ് പരിശോധിച്ചത്.കാസർകോട് ഭാഗത്ത് വിജിലൻസ് ഇൻസ്പെക്ടർ സിബി തോമസിന്റെ നേതൃത്വത്തിൽ കുമ്പള പഞ്ചായത്തിലെ ആരിക്കാടി–പികെ നഗർ റോഡും ഫിഷ് മാർക്കറ്റ്-കുമ്പള സ്കൂൾ റോഡും ചൗക്കി - ഉളിയത്തടുക്ക പിഡബ്ല്യുഡി റോഡുമാണ് പരിശോധിച്ചത്. ചാലിങ്കാൽ- വെള്ളിക്കോത്ത് റോഡ് നേരത്തെ പിഡബ്ല്യുഡി ഗുണനിലവാര പരിശോധന വിഭാഗം പരിശോധന നടത്തി അപാകത കണ്ടെത്തിയതാണ്.

വിജിലൻസിന്റെ കണ്ടെത്തൽ

∙ നിർമാണത്തിലെ അപാകത കൊണ്ടാണ് റോഡുകളിൽ വളരെ പെട്ടെന്ന് തന്നെ കുഴികൾ രൂപപ്പെടുന്നതും പൊട്ടിപ്പോകുന്നതുമെന്നാണ് വിജിലൻസിന്റെ വിലയിരുത്തൽ. 

∙ പരിശോധിച്ച 6 റോഡുകളിലും ആവശ്യമായ അനുപാതത്തിൽ സാമഗ്രികൾ ചേർക്കാത്തതാണ്  റോഡ് തകരാൻ ഇടയായതെന്നു കണ്ടെത്തി. എസ്റ്റിമേറ്റ് പ്രകാരമുള്ള അളവിലല്ല സാമഗ്രികൾ ചേർത്തത്.

∙ നിർമാണ സമയത്ത് ഉദ്യോഗസ്ഥർ കൃത്യമായ പരിശോധന നടത്താത്തതും ഉദ്യോഗസ്ഥരും കരാറുകാരുമായുള്ള ഒത്തുകളിയുമാണു റോഡ് സുരക്ഷിതത്വം അട്ടിമറിക്കുന്ന നിലയിലേക്ക് എത്തിച്ചത്.