സ്കൂട്ടറിൽ ഇടിച്ച കാർ വീടിന് മുകളിലേക്കു മറിഞ്ഞു; വീട്ടിൽ ആരുമില്ലാതിരുന്നതിനാൽ വൻ അപകടം ഒഴിവായി

നീലേശ്വരം ∙ റോഡരികിൽ നിർത്തിയിട്ട സ്കൂട്ടറിൽ ഇടിച്ചു നിയന്ത്രണം വിട്ട കാർ വീടിനു മുകളിലേക്കു വീണു. നീലേശ്വരം– എടത്തോട് റോഡ് അരികിൽ വള്ളിക്കുന്നിലെ നീലേശ്വരം താലൂക്ക് ആശുപത്രിക്കു സമീപം സന്ധ്യയോടെയായിരുന്നു അപകടം. ആശുപത്രിക്കു സമീപം തട്ടുകട നടത്തുന്ന ചന്തൂട്ടിയുടെ വീടിന്റെ പിൻഭാഗത്തേക്കാണ് വാഹനം മറിഞ്ഞത്.

ഇവിടെ ആരുമില്ലാതിരുന്നതിനാൽ വൻ അപകടം ഒഴിവായി. വീടിനു കേടുപാടുണ്ടായി. പാലായി ഭാഗത്തേക്കു പോകുകയായിരുന്നു വാഹനത്തിൽ പാലായി സ്വദേശികളായ കെ.കെ.ബാലകൃഷ്ണൻ, രജിത് എന്നിവരാണുണ്ടായിരുന്നത്. ഇരുവർക്കും പരിക്കുണ്ട്.