കുറിപ്പടിയില്ലാതെ മരുന്ന്; ജൻ ഔഷധിയിൽ റെയ്ഡ്: ലഹരിക്കായി കുട്ടികൾക്കടക്കം മരുന്ന് നൽകിയെന്ന് പരാതി

നീലേശ്വരം ∙ മരുന്നുകൾ കുറിപ്പടിയില്ലാതെ വിറ്റതിനെത്തുടർന്ന് ജൻ ഔഷധിയുടെ പടന്നക്കാട്ടെ വിൽപനകേന്ദ്രത്തിന്റെ ലൈസൻസ് റദ്ദാക്കുന്നതിന് എക്സൈസ് ശുപാർശ നൽകി. മാരക രോഗങ്ങൾക്ക് നൽകുന്ന ഗുളികകൾ ലഹരിക്കായി കുട്ടികൾക്കടക്കം നൽകുന്നതായുള്ള പരാതിയെത്തുടർന്നാണ് ജൻ ഔഷധിയിൽ റെയ്ഡ് നടത്തിയത്. മാനദണ്ഡങ്ങൾ പാലിക്കാതെ കുട്ടികൾക്ക് ഗുളികകൾ വിതരണം ചെയ്തായി കണ്ടെത്തി. 

ഡപ്യൂട്ടി എക്സൈസ് കമ്മിഷണർ ജോയ് ജോസഫിന്റെ നിർദേശാനുസരണം ഹൊസ്ദുർഗ് എക്സൈസ് സർക്കിൾ ഇൻസ്‌പെക്ടർ വി.വി.പ്രസന്നകുമാർ, ഡ്രഗ് ഇൻസ്‌പെക്ടർ ഇ.എൻ.ബിജിൻ എന്നിവരുടെ നേതൃത്വത്തിലാണ് ഇന്നലെ മിന്നൽ പരിശോധന നടത്തിയത്. അസിസ്റ്റന്റ് ഇൻസ്‌പെക്ടർമാരായ കെ.കെ.ബാലകൃഷ്ണൻ, ബാബു, വിമുക്തി മെന്റർ പി.ഗോവിന്ദൻ, സിവിൽ എക്സൈസ് ഓഫിസർ പി.മനോജ്‌ എന്നിവരും സംഘത്തിലുണ്ടായിരുന്നു.