തലയിൽ ചീമുട്ട, ഉണക്കമീൻ മാല; ജന്മദിനാഘോഷം അതിരുവിട്ടപ്പോൾ...
Mail This Article
അഞ്ചൽ ∙ കൈകാലുകൾ കെട്ടിയിട്ട് കൂട്ടുകാരന്റെ തലയിൽ ചീമുട്ട ഒഴിച്ചും ഉണക്കമീൻ മാല ചാർത്തിയും കോളജിനു മുന്നിൽ വിദ്യാർഥികളുടെ ജന്മദിനാഘോഷം. അതിരുവിട്ട ആഘോഷത്തിൽ പങ്കെടുത്തവർക്കെതിരെ അച്ചടക്ക നടപടി സ്വീകരിക്കാൻ സെന്റ് ജോൺസ് കോളജ് കൗൺസിൽ തീരുമാനം.
കഴിഞ്ഞദിവസമാണ് കോളജിനു മുന്നിലെ ഗേറ്റിനു സമീപം പ്രാകൃത രീതിയിൽ ബെർത്ത് ഡേ പാർട്ടി അരങ്ങേറിയത്. ‘ബർത്ത്ഡേ ബേബിയായ’ കൂട്ടുകാരനെ ഒരു സംഘം വിദ്യാർഥികൾ കോളജിൽ നിന്നു പൊക്കിയെടുത്ത് ഗേറ്റിനു മുന്നിൽ എത്തിച്ചു തൂണിൽ കെട്ടിയിടുകയായിരുന്നു. പിന്നീട് തലയിൽ ചീമുട്ട ഒഴിച്ചു. കഴുത്തിൽ ചാർത്തിയത് ഉണക്കമീൻ മാല. തുടർന്ന് ചുറ്റും നിന്ന് പാട്ടും നൃത്തവും.
അഞ്ചൽ – കുളത്തൂപ്പുഴ റോഡരികിലെ ഈ സാഹസം എന്താണെന്ന് അറിയാൻ നാട്ടുകാർ ചുറ്റും കൂടി. ഇതിനിടെ ജന്മദിനക്കാരന്റെ കാലിലെ കെട്ടഴിഞ്ഞു. തലയിൽ ചീമുട്ട ഒഴിച്ച കൂട്ടുകാരെ പിടികൂടാൻ പിന്നാലെ പാഞ്ഞു. ഓട്ടത്തിനിടെ ഒരാൾക്ക് മതിലിൽ തട്ടി വീണ് മുഖത്ത് ആഴത്തിൽ മുറിവേറ്റു.
അധികം വൈകാതെ വിവരം കോളജ് മാനേജ്മെന്റിനു മുന്നിലെത്തി. കോളജ് കൗൺസിൽ യോഗം ചേർന്ന് വിവരം പൊലീസിൽ അറിയിച്ചു. ജന്മദിനാഘോഷം നടത്തിയ കുട്ടികളുടെ രക്ഷിതാക്കളെയും ആഘോഷവിവരം ധരിപ്പിക്കും.