ട്രിപ്പിൾ ലോക്ഡൗൺ; ദേശീയപാതയിലൂടെ പോകുന്നവർ അറിയാൻ, ഗതാഗതം ഇങ്ങനെ
Mail This Article
കൊല്ലം ∙ കോവിഡ് അതിവ്യാപനം തടയാൻ ജില്ലയിലെ തീവ്ര കണ്ടെയ്ൻമെന്റ് സോണുകളായ ചവറയിലും പന്മനയിലും ഇന്നു വൈകിട്ട് 6 മുതൽ 23 നു വൈകിട്ടു 6 വരെ ട്രിപ്പിൾ ലോക്ഡൗൺ. കണ്ടെയ്ൻമെൻറ് സോണിൽ എവിടെയും നിർത്താൻ അനുവദിക്കില്ലെന്ന നിബന്ധനയോടെ ദേശീയപാതയിലൂടെയുള്ള ഗതാഗതം അനുവദിക്കും.
ഈ സോണുകളിൽ ഉള്ള കുടുംബങ്ങൾക്ക് 5 കിലോ അരി സൗജന്യമായി നൽകും. ഈ പ്രദേശങ്ങളിൽ അവശ്യവസ്തുക്കൾ വിൽക്കുന്ന കടകൾക്കു രാവിലെ 7 മുതൽ 9 വരെ സാധനങ്ങൾ ശേഖരിക്കാനും രാവിലെ 10 മുതൽ വൈകിട്ട് 6 വരെ വിൽപന നടത്താനും തുറന്നു പ്രവർത്തിക്കാം. പാൽ വിൽക്കുന്ന കടകൾക്കു രാവിലെ 5 മുതൽ 10 വരെയും വൈകിട്ട് 4 മുതൽ 6 വരെയും പ്രവർത്തിക്കാം.രാത്രിയാത്ര വൈകിട്ട് 7 മുതൽ പുലർച്ചെ 5 വരെ നിരോധിച്ചിട്ടുണ്ട്.
റവന്യൂ, പൊലീസ്, ആരോഗ്യ വകുപ്പ് എന്നിവർ ഉൾപ്പെടുന്ന മുഴുവൻ സമയ റാപ്പിഡ് റെസ്പോൺസ് ടീം ഈ മേഖലയിൽ പ്രവർത്തന സജ്ജമായിരിക്കും. ആവശ്യക്കാർക്കു മാറിത്താമസിക്കാൻ റിവേഴ്സ് ക്വാറന്റീൻ സ്ഥാപനങ്ങൾ സജീകരിക്കും. നിർബന്ധപൂർവം മാറ്റില്ല. മെഡിക്കൽ അടിയന്തര സാഹചര്യങ്ങൾ, അവശ്യവസ്തുക്കളുടെയും സേവനങ്ങളുടെയും വിതരണം എന്നിവയല്ലാതെ ഈ സോണുകളിലേക്കോ പുറത്തേക്കോ ഉള്ള യാത്ര അനുവദിക്കില്ല.