കോവിഡ് വീണ്ടും കൂടുന്നു; 11% പേർ ആശുപത്രിയിൽ;പനി വാർഡുകളും തുറന്നു

കൊല്ലം ∙ ജില്ലയിൽ കോവിഡ് കേസുകളിൽ വീണ്ടും വർധന. ഇന്നലെ 382 കേസുകൾ കൂടി റിപ്പോർട്ട് ചെയ്തു. ഇതിൽ തന്നെ ആശുപത്രിയിൽ പ്രവേശിപ്പിക്കേണ്ടി വരുന്നവരുടെ എണ്ണം 11 ശതമാനമാണ്. മറ്റ് അസുഖങ്ങൾ ഉള്ളവരിലും വാക്സീൻ എടുക്കാത്തവരിലുമാണു കോവിഡ് ഗുരുതരമാകുന്നതെന്ന് ആരോഗ്യ വകുപ്പ് പറയുന്നു. ബൂസ്റ്റർ ഡോസ് എടുക്കാനുള്ളവർ എത്രയും വേഗം എടുക്കണമെന്നും സ്കൂളുകൾ തുറന്ന സാഹചര്യത്തിൽ അധ്യാപകരുടെ ബൂസ്റ്റർ ഡോസ് വൈകിപ്പിക്കരുതെന്നും ആരോഗ്യ വകുപ്പ് അറിയിച്ചു.

കുട്ടികളുടെ വാക്സിനേഷൻ എല്ലാ ശനിയാഴ്ചകളിലും പിഎച്ച്സികളിൽ ലഭ്യമാണ്. പനിയോ മറ്റു ലക്ഷണങ്ങളോ ഉള്ള കുട്ടികളെയും കോവിഡ് ബാധിതരുമായി പ്രാഥമിക സമ്പർക്കമുള്ള കുട്ടികളെയും സ്കൂളുകളിൽ വിടരുത്. ഡെങ്കി, വൈറൽ പനി എന്നിവ ബാധിച്ചതോടെ താലൂക്ക് ആശുപത്രികൾ ഉൾപ്പെടെ കൊതുക് വലയിട്ട പനി വാർഡുകൾ സജ്ജമാക്കി.