കുടുംബശ്രീ നിർമിച്ചത് 1,98,732 ദേശീയപതാക

കൊല്ലം ∙ സ്വാതന്ത്ര്യത്തിന്റെ 75ാം വാർഷികാഘോഷങ്ങളുടെ ഭാഗമായുള്ള ‘ഹർ ഘർ തിരംഗ' പരിപാടിയുടെ ഭാഗമായി കുടുംബശ്രീ ജില്ലാ മിഷന്റെ നേതൃത്വത്തിൽ 1,98,732 ദേശീയ ‌പതാകകൾ നിർമിച്ചു. കുടുംബശ്രീ ജില്ലാ കോ ഓർഡിനേറ്റർ എ. ജയഗീതയുടെ നേതൃത്വത്തിലാണ് പതാക നിർമാണം. മൂന്ന് അപ്പാരൽ പാർക്ക് ഉൾപ്പെടെ 45 കുടുംബശ്രീ സംരംഭങ്ങൾ മുഖേനയാണ് നിർമാണം നടന്നത്.

മുഴുവൻ തദ്ദേശ സ്ഥാപനങ്ങൾക്കും എൻസിസി കൊല്ലം, കൊട്ടാരക്കര യൂണിറ്റുകൾക്കുമാണ് പതാകകൾ വിതരണം ചെയ്യുന്നത്. ഓരോ തദ്ദേശ സ്ഥാപങ്ങളും അതത് പ്രദേശങ്ങളിലെ വീടുകളുടെയും സ്‌കൂളുകളുടെയും എണ്ണം കണക്കാക്കി ഡപ്യൂട്ടി ഡയറക്ടർ ഓഫ് പഞ്ചായത്ത് മുഖേനയാണ് ഓർഡറുകൾ സ്വീകരിച്ചത്. പോളിയസ്റ്റർ കോട്ടൺ മിക്‌സ് തുണിയിൽ തയാറാക്കിയ പതാകയ്ക്ക് 28 രൂപയാണ് വില. നിലവിൽ 75,000 ദേശീയ പതാകകൾ വിതരണത്തിനായി കുടുംബശ്രീ സിഡിഎസ് സംരംഭ യൂണിറ്റുകളിൽ എത്തിച്ചു.