തിരുവനന്തപുരം സെന്റ് തോമസ് റസിഡൻഷ്യൽ സ്കൂൾ ചാംപ്യന്മാർ
Mail This Article
കൊല്ലം ∙ കൊല്ലത്തു നടന്ന ഐസിഎസ്ഇ – ഐഎസ്സി സോൺ ‘എ' കായിക മേളയിൽ തിരുവനന്തപുരം സെന്റ് തോമസ് റസിഡൻഷ്യൽ സ്കൂൾ (370 പോയിന്റ്) ഓവറോൾ ചാംപ്യന്മാരായി. കൊല്ലം തങ്കശ്ശേരി ഇൻഫന്റ് ജീസസ് ആംഗ്ലോ - ഇന്ത്യൻ ഹയർസെക്കൻഡറി സ്കൂൾ (245 പോയിന്റ്) റണ്ണറപ്. മീറ്റ് സമാപന സമ്മേളനത്തിൽ സിറ്റി പൊലീസ് എസിപി എ.അഭിലാഷ് സമ്മാനവിതരണം നിർവഹിച്ചു. കായിക മേള സ്പോർട്സ് കോഓർഡിനേറ്ററും തങ്കശ്ശേരി ഇൻഫന്റ് ജീസസ് ആംഗ്ലോ - ഇന്ത്യൻ ഹയർസെക്കൻഡറി സ്കൂൾ പ്രിൻസിപ്പലുമായ റവ.ഡോ.സിൽവി ആന്റണി അധ്യക്ഷത വഹിച്ചു. ജൂനിയർ പ്രിൻസിപ്പൽ ഡോണാ ജോയി, തേവലക്കര ഹോളി ട്രിനിറ്റി പ്രിൻസിപ്പൽ ലീന എന്നിവർ പ്രസംഗിച്ചു.
ഓവറോൾ ചാംപ്യൻഷിപ് കരസ്ഥമാക്കിയ സ്കൂളുകൾ
മത്സരത്തിൽ ടീം ഓവറോൾ ചാംപ്യൻഷിപ് കരസ്ഥമാക്കിയ സ്കൂളുകളും സ്കോറും – അണ്ടർ 14 ആൺകുട്ടികളുടെ വിഭാഗത്തിൽ തിരുവനന്തപുരം സെന്റ്.തോമസ് റസിഡൻഷ്യൽ സ്കൂൾ (24 പോയിന്റ്). പെൺകുട്ടികളുടെ വിഭാഗത്തിൽ തങ്കശ്ശേരി മൗണ്ട് കാർമൽ സ്കൂൾ (30 പോയിന്റ്). അണ്ടർ 17 ആൺകുട്ടികളുടെ വിഭാഗത്തിൽ തങ്കശ്ശേരി ഇൻഫന്റ് ജീസസ് ആംഗ്ലോ - ഇന്ത്യൻ ഹയർസെക്കൻഡറി സ്കൂൾ (74 പോയിന്റ്).
അണ്ടർ 17 പെൺകുട്ടികളുടെ വിഭാഗത്തിൽ തിരുവനന്തപുരം സെന്റ് തോമസ് റസിഡൻഷ്യൽ സ്കൂൾ (88 പോയിന്റ്). അണ്ടർ 19 ആൺകുട്ടികളുടെ വിഭാഗത്തിൽ ഇൻഫന്റ് ജീസസ് ആംഗ്ലോ - ഇന്ത്യൻ ഹയർസെക്കൻഡറി സ്കൂൾ (84 പോയിന്റ്). പെൺകുട്ടികളുടെ വിഭാഗത്തിൽ സെന്റ് തോമസ് റസിഡൻഷ്യൽ സ്കൂൾ (96 പോയിന്റ്).