ഡ്രൈവറുടെ മൃതദേഹം ഓട്ടോയിൽ കത്തിക്കരിഞ്ഞ നിലയിൽ
Mail This Article
കുണ്ടറ∙ ഓട്ടോഡ്രൈവറെ ഓട്ടോറിക്ഷയിൽ കത്തിക്കരിഞ്ഞ നിലയിൽ കണ്ടെത്തി. പെരുമ്പുഴ കുരിശടി മുക്ക് ബംഗ്ലാവിൽ പടിഞ്ഞാറ്റതിൽ മൈക്കിൾ ഭവനിൽ ഉണ്ണിക്കൃഷ്ണൻ (55) ആണു മരിച്ചത്. പെരുമ്പുഴ - കേരളപുരം റോഡിൽ കുരിശടി മുക്കിനു സമീപത്തെ ഒഴിഞ്ഞ പുരയിടത്തിലാണ് കത്തിക്കരിഞ്ഞ നിലയിൽ ഓട്ടോറിക്ഷയും ആളെയും കണ്ടെത്തിയത്.
കഴിഞ്ഞ 30 ന് രാത്രി 11.30 മണിക്കായിരുന്നു സംഭവം. ഓട്ടോറിക്ഷ കത്തുന്നത് കണ്ട് അതു വഴി പോയ ബൈക്ക് യാത്രികൻ പൊലീസിനെയും അഗ്നി രക്ഷാസേനയെയും വിവരമറിയിക്കുകയായിരുന്നു. കുണ്ടറയിൽ ഒരു യൂണിറ്റ് അഗ്നി രക്ഷാസേന എത്തിയാണ് തീ അണച്ചത്. കുണ്ടറ പൊലീസ്, സ്പെഷൽ ബ്രാഞ്ച് എന്നിവർ ചേർന്ന് ഓട്ടോറിക്ഷയുടെ എൻജിൻ നമ്പർ കേന്ദ്രീകരിച്ചു നടത്തിയ അന്വേഷണത്തിലാണ് ആളെ തിരിച്ചറിഞ്ഞത്.
പെട്രോൾ പോലെയുള്ള ഇന്ധനം ഒഴിച്ച ശേഷം ഓട്ടോയുടെ പിന്നിലിരുന്നു തീ കൊളുത്തിയത് ആകാം എന്നു പൊലീസ് പറഞ്ഞു. വിരലടയാള വിദഗ്ധരും സ്ഥലത്തെത്തി തെളിവുകൾ ശേഖരിച്ചു. പെരുമ്പുഴ കോളനി മുക്ക് സ്റ്റാൻഡിലെ ഓട്ടോ ഡ്രൈവറാണ് ഉണ്ണിക്കൃഷ്ണൻ. ഭാര്യ: ശോഭന. മക്കൾ: സാജൻ, ഷാരോൺ.