കോവിഡ് വാക്സീൻ വിതരണം നിലച്ചു

കൊല്ലം∙ സ്റ്റോക്ക് ഉണ്ടായിരുന്ന കോവിഡ് വാക്സീന്റെ കാലാവധി കഴിഞ്ഞതോടെ ജില്ലയിലെ സർക്കാർ ആശുപത്രികളിലെ വാക്സീൻ വിതരണം നിലച്ചു. 31 വരെയാണ് വാക്സീന് കാലാവധി ഉണ്ടായിരുന്നത്. പുതിയ സ്റ്റോക്ക് വാക്സീൻ ലഭ്യമായാൽ മാത്രമേ ഇനി സർക്കാർ ആശുപത്രികൾ വഴി വാക്സീൻ വിതരണം നടക്കൂ.

കോവിഷീൽഡ് , കോവാക്സീൻ, കോർബെവാക്സ് വാക്സീനുകൾ  2000 ഡോസ് വീതം ജില്ലയിലെ ആരോഗ്യവിഭാഗം സംസ്ഥാന സർക്കാരിനോട് ആവശ്യപ്പെട്ടിട്ടുണ്ട്. അത് ലഭ്യമാകുന്ന മുറയ്ക്ക് ആവും വിതരണം. നിലവിൽ ജില്ലയിലെ 4 സ്വകാര്യ ആശുപത്രികൾ വഴി കോവിഷീൽഡ് വാക്സീൻ ലഭ്യമാകുന്നുണ്ട്.

മൂന്നാം ഡോസ് കരുതൽ വാക്സീൻ വളരെ കുറച്ചുപേർ മാത്രമാണ് ജില്ലയിൽ എടുത്തിട്ടുള്ളത്. 60 വയസ്സിന് മുകളിൽ പ്രായമുള്ളവരും മറ്റ് അസുഖങ്ങൾ ഉള്ളവരും ബൂസ്റ്റർ ഡോസ് എടുക്കേണ്ടതാണെങ്കിലും ഈ വിഭാഗത്തിലെ 80 ശതമാനത്തിൽ അധികം പേരും വാക്സീൻ എടുത്തിട്ടില്ല. ആശാവർക്കർമാർ വഴി പല തവണ വാർഡ് തലങ്ങളിൽ ബോധവൽക്കരണം നടത്തിയിരുന്നു. പുതിയ കോവിഡ് വകഭേദത്തിന്റെ പശ്ചാത്തലത്തിൽ കൂടുതൽ നിബന്ധനകൾ വരുന്നതോടെ പരമാവധി ആളുകൾ ബൂസ്റ്റർ ഡോസ് എടുക്കുമെന്നാണ് കരുതുന്നത്.