വെളിയം ∙ പടിഞ്ഞാറ്റിൻകര വാർഡിലെ ചൂരക്കോട് കൽച്ചിറ റോഡിലെ വെള്ളക്കെട്ട് ജനങ്ങളെ  ദുരിതത്തിലാക്കുന്നതായി പരാതി. ഓടകൾ ഇല്ലാത്തതും വർഷങ്ങളായി റോഡിന്റെ അറ്റകുറ്റപ്പണി നടത്താത്തതുമാണ് വെള്ളക്കെട്ടിനു കാരണം. ചെറിയ മഴ ആയാലും റോഡിൽ വെള്ളം കെട്ടി നിൽക്കുന്നത് പതിവാണ്. നൂറോളം കുടുംബങ്ങൾ റോഡിന്റെ ഇരുവശങ്ങളിലായി താമസിക്കുന്നു. ചൂരക്കോട് നിന്ന് കൽച്ചിറ പള്ളിയലേക്കും നെടുമൺകാവ് സാമൂഹിക ആരോഗ്യകേന്ദ്രത്തിലേക്കും പോകുന്ന പ്രധാന പാതയും എളുപ്പവഴിയുമാണ് ഈ റോഡ്. അതുപോലെ  പടിഞ്ഞാറ്റിൻകര ഗവ.എൽപി സ്കൂളിലേക്കും പോകുന്ന കുട്ടികളെയും റോഡിന്റെ ദയനീയാവസ്ഥ ബുദ്ധിമുട്ടിക്കുന്നു. എത്രയും വേഗം റോഡ് സഞ്ചാരയോഗ്യമാക്കാൻ നടപടി വേണമെന്നാണ് നാട്ടുകാരുടെ ആവശ്യം.