കനത്ത മഴയും കാറ്റും; ദുരന്തപ്പെയ്ത്തിൽ വലഞ്ഞ് ശൂരനാട്

ശൂരനാട് ∙ മഴയ്ക്കൊപ്പം വീശിയടിച്ച ശക്തമായ കാറ്റിൽ ശൂരനാട് വടക്ക്, പോരുവഴി പഞ്ചായത്തുകളിൽ വ്യാപകനാശം. കെ.സി.ടി ജംക്‌ഷൻ – എച്ച്.എസ് ജംക്‌ഷൻ പ്രധാന പാതയിലും ഇടറോഡുകളിലും ഉൾപ്പെടെ ഒട്ടേറെ വൈദ്യുത പോസ്റ്റുകളും ലൈനുകളും തകർന്നു.മരങ്ങൾ കടപുഴകി 30 വീടുകൾ ഭാഗികമായി തകർന്നു. കാലിത്തൊഴുത്തുകളും ശുചിമുറികളും ഉൾപ്പെടെ നശിച്ചു.കമ്പലടി സ്കൂളിനു സമീപത്തെ ചായക്കട തകർന്നു.

ശൂരനാട് വടക്ക് തെക്കേമുറി, പടിഞ്ഞാറ്റം കിഴക്ക്, പടിഞ്ഞാറ്റം മുറി, പോരുവഴി കമ്പലടി, പള്ളിമുറി, മയ്യത്തുംകര മേഖലകളിൽ രാവിലെ 7നാണ് സംഭവം.മണിക്കൂറുകളോളം വൈദ്യുതി മുടങ്ങി. കൃഷിനാശം വ്യാപകമാണ്. ജനപ്രതിനിധികളും സന്നദ്ധപ്രവർത്തകരും നാട്ടുകാരും ചേർന്നാണ് മരങ്ങളും പോസ്റ്റുകളും നീക്കിയത്.