പൊലീസിനെ വെട്ടിച്ചു കടന്ന റിമാൻഡ് പ്രതി പിടിയിലായി

കൊല്ലം∙ ജില്ലാ ജയിലിലേക്ക് കൊണ്ടു പോകുന്നതിനിടെ പൊലീസിനെ വെട്ടിച്ചു കടന്ന റിമാൻഡ് പ്രതി പിടിയിലായി. തങ്കശ്ശേരി കാവൽ നഗർ 91ൽ സാജനാണ് (23) ആലുവ റെയിൽവേ സ്റ്റേഷനിൽ നിന്ന് പിടിയിലായത്. കഴിഞ്ഞ 7ന് വൈകിട്ട് 6.45നാണ് സാജൻ ജില്ലാ ജയിലിന് മുന്നിൽ നിന്നു രക്ഷപ്പെട്ടത്. വാടിയിലെ ഒരു വീട്ടിൽ നിന്ന് കഴിഞ്ഞ മാസം 29ന് മൊബൈൽ മോഷ്ടിച്ച കേസിലാണ് സാജനെ പള്ളിത്തോട്ടം പൊലീസ് പിടികൂടിയത്. അന്ന് ഇയാളെ കോടതി റിമാൻഡ് ചെയ്തു

. ജില്ലാ ജയിലിലേക്ക് കൊണ്ടു പോകവേയാണു പൊലീസിനെ വെട്ടിച്ച് സാജൻ കടന്നത്. ജയിലിനുള്ളിലേക്കു കയറ്റാനായി വിലങ്ങ് അഴിച്ചതിനു പിന്നാലെ ആനന്ദവല്ലീശ്വരം ക്ഷേത്ര ഭാഗത്തേക്ക് ഓടി രക്ഷപ്പെടുകയായിരുന്നു. സംഭവ സമയത്ത് ഡ്രൈവറടക്കം മൂന്ന് പൊലീസുകാരാണ് ഉണ്ടായിരുന്നത്.

ഇവർ പിന്തുടർന്നെങ്കിലും പിടികൂടാനായില്ല. തുടർന്ന് ഹൈദരാബാദിലേക്കു കടന്ന സാജൻ തിരികെ നാട്ടിലേക്ക് വരുന്നതിനിടെയാണ് ഇന്നലെ വൈകിട്ട് 3.30ന് ആലുവ റെയിൽവേ സ്റ്റേഷനിൽ നിന്ന് അറസ്റ്റിലാകുന്നത്. റെയിൽവേ ഇന്റലിജൻസ്, വെസ്റ്റ് പൊലീസ് എന്നിവർ സംയുക്തമായി നടത്തിയ അന്വേഷണത്തിലാണ് സാജനെ കണ്ടെത്താനായത്.