വീട്ടിലെ ബെഡ്റൂമിൽ 21 കഞ്ചാവ് ചെടികൾ വളർത്തി; യുവാവ് അറസ്റ്റിൽ

കൊല്ലം ∙ വീടിനുള്ളിൽ കഞ്ചാവ് ചെടി നട്ട് വളർത്തിയ യുവാവ് പിടിയിൽ. കരുനാഗപ്പള്ളി അയണിവേലിക്കുളങ്ങര മരുതൂർകുളങ്ങര തെക്ക് ചെറുകോൽ പറമ്പിൽ മുഹമ്മദ് മുഹ്സിൻ (32) ആണ് എക്സൈസിന്റെ സംഘത്തിന്റെ പിടിയിലായത്. വീടിന്റെ രണ്ടാം നിലയിലെ ബെഡ് റൂമിലാണ് ഇയാൾ 21 കഞ്ചാവ് ചെടികൾ നട്ട് വളർത്തിയിരുന്നത്. കൂടാതെ 5 ഗ്രാം കഞ്ചാവ്, ആംപ്യൂൾ എന്നിവ പ്രതിയുടെ പക്കൽ നിന്നു കണ്ടെത്തി.

കരുനാഗപ്പള്ളി എക്സൈസ് സർക്കിൾ ഇൻസ്പെക്ടർ പി.അനിൽകുമാറിന്റെ നേതൃത്വത്തിൽ അസി.എക്സൈസ് ഇൻസ്പെക്ടർ (ഗ്രേഡ്) എ.അജിത്‌ കുമാർ, പ്രിവന്റീവ് ഓഫിസർ (ഗ്രേഡ്) എസ്.അനിൽകുമാർ, സിവിൽ എക്സൈസ് ഓഫിസർമാരായ എസ്.അൻഷാദ്, ആർ.അഖിൽ, എസ്.സഫേഴ്സൺ, വനിതാ സിവിൽ എക്സൈസ് ഓഫിസർ എസ്.ജയലക്ഷ്മി, അസി.എക്സൈസ് ഇൻസ്പെക്ടർ ഡ്രൈവർ (ഗ്രേഡ്) പി.എം.മൻസൂർ എന്നിവരടങ്ങിയ സംഘമാണു പരിശോധന നടത്തിയത്.