ഗൃഹോപകരണങ്ങൾ നശിപ്പിച്ച് അജ്ഞാതർ

പത്തനാപുരം ∙ രാത്രിയിൽ വീട്ടിൽ ആരുമില്ലാതിരുന്ന സമയത്ത് കതകു പൊളിച്ച് ഉള്ളിൽ കയറിയ അജ്ഞാതർ ഭീകരാന്തരീക്ഷം സൃഷ്ടിച്ച് വീടിനുള്ളിലെ സാധനങ്ങൾ നശിപ്പിക്കുകയും ലക്ഷങ്ങളുടെ നഷ്ടം വരുത്തുകയും ചെയ്തെന്നു പരാതി. പടയണിപ്പാറ ശിവ വിലാസത്തിൽ ശ്രീജിത്തിന്റെ വീട്ടിലാണ് അക്രമം ഉണ്ടായത്. തറയിൽ ഇട്ടിരുന്ന ടൈൽ, കുടിവെള്ള ടാങ്ക്, ഗൃഹോപകരണങ്ങൾ എന്നിവ നശിപ്പിച്ചവയിൽപ്പെടുന്നു. പണി നടന്നുകൊണ്ടിരിക്കുന്ന പുതിയ വീട്ടിലും സമീപത്തെ കുടുംബവീട്ടിലും ആണ് അക്രമികൾ നാശം വരുത്തിയത്. തൊടുപുഴയിൽ കൺസ്ട്രക്‌ഷൻ കമ്പനിയിൽ ജോലി ചെയ്യുന്ന ശ്രീജിത്ത്, ജോലി സ്ഥലത്തായിരുന്നു. പത്തനാപുരം പൊലീസിൽ പരാതി നൽകി.