വീണ്ടും 2000 കടന്ന് പ്രതിദിന കോവിഡ്; പരിശോധിക്കുന്ന അഞ്ചിൽ 2 പേർക്കു കോവിഡ്

കോട്ടയം ∙ ജില്ലയിൽ പരിശോധിക്കുന്ന അഞ്ചിൽ രണ്ടു പേർക്കു കോവിഡ്. ടെസ്റ്റ് പോസിറ്റിവിറ്റി നിരക്ക് 40 ശതമാനത്തിനടുത്ത്. 135 ദിവസത്തിനു ശേഷം ജില്ലയിൽ പ്രതിദിന കോവിഡ് കേസുകളുടെ എണ്ണം വീണ്ടും 2000 കടന്നു. ഇന്നലെ 2333 പേർക്കു കൂടി കോവിഡ് സ്ഥിരീകരിച്ചു. ടിപിആർ 39.05 ശതമാനം. ജില്ലയിൽ ചികിത്സയിലുള്ളവരുടെ എണ്ണം 9,923ൽ എത്തി.

ഒരാഴ്ചയ്ക്കുള്ളിൽ ചികിത്സയിൽ കഴിയുന്നവരുടെ എണ്ണം ഇരട്ടിയിൽ അധികമായി.കഴിഞ്ഞ സെപ്റ്റംബറിലാണ് ഇതിനു മുൻപു കോവിഡ് പ്രതിദിന കേസുകൾ 2000 കടന്നത്. അന്നു പക്ഷേ, ടെസ്റ്റ് പോസിറ്റിവിറ്റി നിരക്ക് 19.03% മാത്രമായിരുന്നു. കോവിഡ് വർധനയുടെ നിരക്ക് ഉയരുമ്പോഴും പരിശോധനകളുടെ എണ്ണത്തിൽ ജില്ലയിൽ വർധനയില്ല. ജില്ലയിൽ പ്രതിദിനം ശരാശരി 5000 പരിശോധനകളാണു നടക്കുന്നത്.

85 ശതമാനം കടന്ന് കുട്ടികളുടെ വാക്സിനേഷൻ

ജില്ലയിൽ കുട്ടികളുടെ വാക്സീൻ വിതരണം 86.21 ശതമാനത്തിൽ എത്തി. 15–18 വയസ്സിന് ഇടയിലുള്ള 73,627 കുട്ടികൾ ഇതുവരെ സ്വീകരിച്ചു. ഇന്നലെ 2,851 കുട്ടികൾ വാക്സീനെടുത്തു. 18 വയസ്സിനു മുകളിലുള്ളവരിൽ 99.07% പേർ‌ ഒന്നാം ഡോസ് സ്വീകരിച്ചതായാണു ജില്ലാ മെഡിക്കൽ ഓഫിസിന്റെ കണക്ക്. 15.48 ലക്ഷം പേർ ഒന്നാം ഡോസ് സ്വീകരിച്ചു. ഇതിൽ 13.12 ലക്ഷം പേർ രണ്ടു ഡോസും എടുത്തു. 19,109 പേരാണു കരുതൽ ഡോസ് സ്വീകരിച്ചത്. ജില്ലയിൽ ഇന്ന് 74 കേന്ദ്രങ്ങളിൽ വാക്സീൻ നൽകും. 13 കേന്ദ്രങ്ങളിൽ കുട്ടികൾക്കും 61 കേന്ദ്രങ്ങളിൽ മുതിർന്നവർക്കുമാണു നൽകുന്നത്. അർഹരായവർക്കു കേന്ദ്രങ്ങളിൽ നേരിട്ടെത്തി സ്വീകരിക്കാമെന്നു കലക്ടർ അറിയിച്ചു.