ആളുകൾ നോക്കിനിൽക്കെ പുല്ലകയാറ്റിൽ മുങ്ങിയും പൊങ്ങിയും ആ ജീവൻ; രക്ഷിക്കാനായില്ല

കൂട്ടിക്കൽ ∙ ആളുകൾ നോക്കി നിൽക്കെ പെരുവെള്ളത്തിൽ ഒഴുകിപ്പോകുന്ന യുവാവ്. ഒരു കിലോമീറ്റർ നാട്ടുകാർ പിന്നാലെ ഓടിയിട്ടും രക്ഷിക്കാനായില്ല. കുന്നുംപുറത്ത് റിയാസാണ് (45) ഇന്നലെ വൈകിട്ട് മൂന്നരയോടെ ടൗണിനു സമീപം പുല്ലകയാറിൽ ഒഴുക്കിൽപെട്ടത്. നാട്ടുകാർ റോഡിലൂടെ പിന്നാലെ ഓടി. കര കവിഞ്ഞൊഴുകുന്ന ആറ്റിൽ പലയിടങ്ങളിലും റിയാസ് പൊങ്ങിത്താഴുന്നതു കണ്ടു. ഒടുവിൽ ചപ്പാത്ത് പാലത്തിനു താഴെ റോഡിൽ നിന്ന് അഞ്ചടി അകലെ മാത്രമായി റിയാസ് പൊങ്ങിവരുന്നതു കണ്ടെങ്കിലും രക്ഷിക്കാൻ കഴിഞ്ഞില്ല.

ആ സമയത്തും ജീവനുണ്ടായിരുന്നതായി നാട്ടുകാർ പറയുന്നു. തുടർന്ന് അഗ്നിരക്ഷാസേനയും നാട്ടുകാരും ചേർന്ന് പുല്ലകയാറ്റിലും മണിമലയാറിന്റെ വിവിധ പ്രദേശങ്ങളിലും തിരച്ചിൽ നടത്തിയെങ്കിലും കണ്ടെത്താൻ കഴിഞ്ഞില്ല. കൂട്ടിക്കൽ ടൗണിലെ ചുമട്ടുതൊഴിലാളിയാണ് റിയാസ്.