സ്ത്രീശാക്തീകരണം ലക്ഷ്യമിട്ട് ‘വെൻ’ കോട്ടയത്തും

കോട്ടയം ∙ വിമൻ ഒൻട്രപ്രനർ നെറ്റ്‌വർക് കോട്ടയം ചാപ്റ്ററിന്റെ (വെൻ) ഉദ്ഘാടനം മനോരമ ഓൺലൈൻ ചീഫ് എക്സിക്യൂട്ടീവ് ഓഫിസർ മറിയം മാമ്മൻ മാത്യു നിർവഹിച്ചു. വെൻ ഫൗണ്ടർ ഷീല കൊച്ചൗസേപ്പ് അധ്യക്ഷത വഹിച്ചു. ഭാരവാഹികൾ: മറിയാമ്മ പയസ് (ചാപ്റ്റർ ചെയർ), ചിനു മാത്യു (വൈസ് ചെയർ), റീബാ വർഗീസ് (കൺവീനർ).സ്ത്രീ സംരംഭകരുടെ കൂട്ടായ്മയും നെറ്റ്‌വർക്കിങ്, പരിശീലനം, മെന്ററിങ് എന്നിവയിലൂടെ സ്ത്രീശാക്തീകരണവുമാണ് സംഘടന ലക്ഷ്യമിടുന്നത്. 

കൊച്ചിയിൽനിന്നാണു പ്രവർത്തനം ഏകോപിപ്പിക്കുന്നത്. വനിതാ സംരംഭകർക്കു വേണ്ട അറിവും അനുഭവപരിചയവും പങ്കുവയ്ക്കുക, സ്ത്രീപുരുഷ തുല്യത ഉറപ്പു വരുത്തുക എന്നിവയും വെൻ ലക്ഷ്യമിടുന്നു. കൊച്ചി, തൃശൂർ, കോഴിക്കോട് എന്നിവിടങ്ങളിൽ ശാഖകളുണ്ട്. തിരുവനന്തപുരത്ത് ഉടൻ പ്രവർത്തനം ആരംഭിക്കും.