പാലാ മിനി മാരത്തൺ നാളെ; ഉദ്ഘാടക പി.ടി.ഉഷ

കോട്ടയം ∙ സ്പോർട്സ് ലെഗസി ഫൗണ്ടേഷൻ സംഘടിപ്പിക്കുന്ന പാലാ മിനി മാരത്തൺ നാളെ പുലർച്ചെ 5.30നു പാലാ നഗരസഭാ സ്റ്റേഡിയത്തിൽ ഒളിംപ്യൻ പി.ടി.ഉഷ എംപി ഉദ്ഘാടനം ചെയ്യും. 6.30നു മാരത്തൺ തുടങ്ങും.10 കിലോമീറ്റർ ഓട്ടം ജോസ് കെ.മാണി എംപി ഫ്ലാഗ് ഓഫ് ചെയ്യും. തുടർന്ന് 5 കിലോമീറ്റർ വിഭാഗം മത്സരം. 45 വയസ്സിനു മുകളിലുള്ളവർക്കായി നടക്കുന്ന 5 കിലോമീറ്റർ മത്സരം പിന്നാലെ.

16 വയസ്സിൽ താഴെയുള്ളവർക്കായുള്ള 2 കിലോമീറ്റർ ഓട്ടം അവസാന ഇനമായി നടക്കും. വിജയികൾക്ക് 1.25 ലക്ഷം രൂപ ആകെ സമ്മാനത്തുക നൽകും. പങ്കെടുക്കുന്ന എല്ലാവർക്കും മെഡൽ, ടി–ഷർട്ട്, സർട്ടിഫിക്കറ്റ്, ബാഗ് എന്നിവ ലഭിക്കും. ഇന്നു വൈകിട്ട് 5 വരെ നഗരസഭാ സ്റ്റേഡിയത്തിൽ സ്പോട്ട് ബുക്കിങ്ങിന് അവസരമുണ്ടെന്നു സംഘാടകരും മുൻ അത്‍ലീറ്റുകളുമായ മനോജ് ലാൽ, ലിജോ ഡേവിഡ് തോട്ടാൻ, പി.രാമചന്ദ്രൻ എന്നിവർ പറഞ്ഞു.