പുതുയന്ത്രം എത്തി ‘പോ പോളേ’യെന്ന് ഇനി ധൈര്യമായി പറയാം

കുമരകം ∙ ജലാശയങ്ങളിലെ പോള നീക്കം ചെയ്യാൻ ഉപകരണം വികസിപ്പിച്ചു. കലക്ടർ ഡോ.പി.കെ. ജയശ്രീയുടെ നിർദേശത്തെത്തുടർന്നാണ് ഉപകരണം തയാറാക്കിയത്.കുളവാഴ,  എന്നിവ അനായാസം നീക്കാനാവുന്ന ഉപകരണമാണിത്. പല നീളത്തിലുള്ള ഈ ഉപകരണം ഉപയോഗിച്ച് അകലത്തിലുള്ള പോളയും നീക്കാം

നീളത്തിലുള്ള സ്റ്റീൽ കൈപ്പിടിയും  അറ്റത്ത് സ്റ്റീൽ കൊണ്ടുതന്നെയുള്ള ചെറിയ കമ്പികൾ ഇരുവശത്തേക്കും നിരകളായി പിടിപ്പിച്ചതുമാണ് ഉപകരണം.കൈപ്പിടിയിൽ നിന്ന് ഈ ഭാഗം ഊരി മാറ്റാനാവും.കൊണ്ടു നടക്കാനും പ്രയാസമില്ല. കൃഷി വിജ്‌ഞാനകേന്ദ്രത്തിൽ ഇന്നു 10നു ജില്ലാ പഞ്ചായത്ത് പ്രസിഡന്റ് കെ.വി.ബിന്ദു ഉദ്ഘാടനം നിർവഹിക്കും. 

കൃഷിശാസ്ത്രജ്ഞകൂടിയായ കലക്ടറുടെ ആവശ്യ പ്രകാരം തിരുവനന്തപുരം ബാർട്ടൻഹിൽ ഗവ. എൻജിനിയറിങ് കോളജ് ട്രാൻസ്​​ലേഷനൽ റിസർച് ആൻഡ് പ്രഫഷനൽ ലീഡർഷിപ് സെന്ററാണ് ഉപകരണം വികസിപ്പിച്ചത്. കരയിൽ നിന്ന് ഉപകരണം ഉപയോഗിച്ച് പോള കരഭാഗത്തേക്ക് അടുപ്പിച്ച ശേഷം വാരി മാറ്റാനാവും. പടിഞ്ഞാറൻ മേഖലയിൽ പോളശല്യം രൂക്ഷമായപ്പോഴാണ് ഈ ആശയം രൂപപ്പെട്ടത്. കലക്ടർ പല തവണ കൃഷി വിജ്ഞാന കേന്ദ്രത്തിൽ എത്തി ഇതെക്കുറിച്ചു ചർച്ച നടത്തിയിരുന്നു.