ഹോട്ടലുകൾ വ‍ൃത്തിഹീനം, പഴകിയ ആഹാരം പിടിച്ചെടുത്തു; കടുത്തുരുത്തിയിലെ ഹോട്ടലുകളിൽ ആരോഗ്യവകുപ്പിന്റെ പരിശോധന

കടുത്തുരുത്തി∙ ആരോഗ്യവകുപ്പ് പഞ്ചായത്തിന്റെ വിവിധ പ്രദേശങ്ങളിലെ ഹോട്ടലുകളിൽ പരിശോധന നടത്തി. പഴകിയ ആഹാരം പിടിച്ചെടുത്തു. ഹോട്ടലുകൾ വൃത്തിഹീനമായ അന്തരീക്ഷത്തിലാണു പ്രവർത്തിക്കുന്നതെന്നു പരിശോധനയിൽ കണ്ടെത്തി. വാലാച്ചിറയിലും കടുത്തുരുത്തി ഇടക്കര വളവിലും പ്രവർത്തിക്കുന്ന ഹോട്ടലുകളിൽ നിന്നാണ് പഴകിയ ആഹാരം പിടിച്ചെടുത്തത്. ഹെൽത്ത് കാർഡ് എടുക്കാത്ത 4 സ്ഥാപനങ്ങൾക്കു നോട്ടിസ് നൽകി.

മലിനജലം പൊട്ടിയൊഴുകുന്നതായി കാണപ്പെട്ട ആപ്പാഞ്ചിറ മാന്നാറിലെ റസ്റ്ററന്റ് അടച്ചു പൂട്ടുന്നതിനു പഞ്ചായത്ത് സെക്രട്ടറിക്കു കത്തുനൽകി. കടുത്തുരുത്തി മേഖലയിലെ പല ഹോട്ടലുകളിലും ആഹാരസാധനങ്ങൾ വൃത്തിരഹിതമായ അന്തരീക്ഷത്തിലാണ് പാചകം ചെയ്യുന്നതെന്നു കണ്ടെത്തിയിരുന്നു. സാധനങ്ങൾക്കു പല വില ഈടാക്കുന്നതായി പരാതി ഉയർന്നിരുന്നു.