പാമ്പാടി ∙ വീട് കുത്തിതുറന്ന് ഡയമണ്ട് ആഭരണങ്ങളും 6 പവൻ സ്വർണവും അരലക്ഷം രൂപയും കവർന്ന സംഭവത്തിൽ സമാന സ്വാഭാവത്തിൽ മോഷണം നടത്തുന്ന കവർച്ച സംഘങ്ങളുടെ പട്ടിക തയാറാക്കി പൊലീസ്. മോഷണം നടന്ന വീട്ടിൽ നിന്നും വിരലടയാളം ലഭിക്കാത്ത സാഹചര്യത്തിലാണ് അന്വേഷണത്തിന്റെ ഗതി പൊലീസും മാറ്റിയത്. അടുക്കള വാതിലിലൂടെ വീടുകളിൽ കടന്ന് മോഷണം നടത്തുന്ന മോഷ്ടാക്കളെ കേന്ദ്രീകരിച്ചാണ് അന്വേഷണം പുരോഗമിക്കുന്നത്. 

പാമ്പാടി മീനടം പുത്തൻപുരപ്പടി കുഴിയാത്തുകടുപ്പിൽ മാത്യു സ്കറിയ (സണ്ണി)യുടെ വീട്ടിലാണ് കഴിഞ്ഞ ഞായറാഴ്ച രാവിലെ മോഷണം നടന്നത്. രാവിലെ 7.15നു കുർബാനയ്ക്ക് പള്ളിയിലേക്ക് പോയി. 10.45നാണ് മടങ്ങി വന്നത്. മുൻവാതിൽ തുറക്കാൻ ശ്രമിച്ചെങ്കിലും നടന്നില്ല. മുൻവാതിൽ പുറത്ത് നിന്നും പൂട്ടിയിട്ടാണ് പള്ളിയിലേക്ക് പോയത്. വാതിൽ താക്കോലിട്ടു തുറക്കാൻ പറ്റാതെ വന്നതോടെ ആശങ്കയായി. തുടർന്ന് പിൻവശത്തെ അടുക്കള വാതിൽ തുറന്ന് വീട്ടിലേക്ക് കയറാൻ നോക്കിയപ്പോൾ വാതിൽ കുത്തിതുറന്നിട്ട നിലയിൽ കണ്ടെത്തി.

വീടിനകത്ത് കയറിയപ്പോൾ മുൻവശത്തെ വാതിൽ അകത്ത് നിന്നും കുറ്റിയിട്ട നിലയിലും കണ്ടെത്തി. വീടിനകത്ത് നടത്തിയ പരിശോധനയിലാണ് അലമാരയിൽ സൂക്ഷിച്ചിരുന്ന പണവും സ്വർണാഭരണങ്ങളും ഒരു ജോഡി ഡയമണ്ട് കമ്മലുകളും നഷ്ടപ്പെട്ടതായി കണ്ടെത്തിയത്.