സ്തുതിഗീതങ്ങളുമായി ഓശാനപ്പെരുന്നാൾ

കാഞ്ഞിരപ്പള്ളി ∙ തീക്ഷ്ണമായ പ്രാർഥനയുടെയും ധ്യാനത്തിന്റെയും ദിനങ്ങളായ വിശുദ്ധ വാരത്തിന് ഓശാന ഞായറോടെ തുടക്കമായി. സെന്റ് ഡൊമിനിക്സ് കത്തീഡ്രലിൽ രൂപതാധ്യക്ഷൻ മാർ ജോസ് പുളിക്കൽ കാർമികത്വം വഹിച്ചു. കത്തീഡ്രൽ വികാരി ഫാ. കുര്യൻ താമരശ്ശേരി, ഫാ. ജേക്കബ് ചാത്തനാട്ട് എന്നിവർ സഹകാർമികത്വം വഹിച്ചു. 

കത്തീഡ്രൽ ഗ്രോട്ടോയിൽ ആരംഭിച്ച തിരുക്കർമങ്ങളെ തുടർന്ന് കത്തീഡ്രലിലേക്കു നടത്തിയ പ്രദക്ഷിണത്തിൽ ഓശാന വിളികളുമായി വിശ്വാസി സമൂഹം പങ്കു ചേർന്നു. രൂപതാ മുൻ അധ്യക്ഷൻ മാർ മാത്യു അറയ്ക്കൽ എരുമേലി അസംപ്ഷൻ ഫൊറോന പള്ളിയിൽ ഓശാന തിരുക്കർമങ്ങൾക്ക് കാർമികത്വം വഹിച്ചു. എരുമേലി ഫൊറോന വികാരി ഫാ.‌ വർഗീസ് പുതുപ്പറമ്പിൽ, ഫാ. തോമസ് പരിന്തിരിക്കൽ എന്നിവർ സഹകാർമികത്വം വഹിച്ചു.