കാറും ബസും കൂട്ടിയിടിച്ച് രണ്ടുപേർക്ക് പരുക്ക്

മാന്തുരുത്തി ∙ കാറും സ്വകാര്യ ബസും കൂട്ടിയിടിച്ച് കാർ യാത്രക്കാരായ സഹോദരങ്ങൾക്ക് പരുക്ക്. മാന്തുരുത്തി മൂലേക്കുന്ന് മരിയ ചെറിയാൻ (26), സഹോദരൻ തിമോത്തി ചെറിയാൻ (23) എന്നിവർക്കാണ് പരുക്കേറ്റത്. ഇരുവരെയും കോട്ടയം മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. അരമണിക്കൂർ ഗതാഗതം  തടസ്സപ്പെട്ടു. ഇന്നലെ ഉച്ചകഴിഞ്ഞ് 2.30നു വാഴൂർ – ചങ്ങനാശേരി റോഡിലായിരുന്നു അപകടം.

വീട്ടിൽ എത്തിയവരെ വാഴൂരിലെ വീട്ടിലേക്ക് വിടാനായി പോകുമ്പോൾ ആഴാംചിറ ഭാഗത്ത് വച്ച് എതിരെ വന്ന ബസുമായി കൂട്ടിയിടിക്കുകയായിരുന്നു. തിമോത്തിയാണു കാറോടിച്ചത്. ഇടിയുടെ ആഘാതത്തിൽ കാർ ഭാഗികമായി തകർന്നു. പിൻസീറ്റിൽ ഉണ്ടായിരുന്നവർ പരുക്കേൽക്കാതെ രക്ഷപ്പെട്ടു. കാറിനുള്ളിൽ കുടുങ്ങിയ യാത്രക്കാരെ നാട്ടുകാരാണ് രക്ഷപ്പെടുത്തിയത്.