അങ്ങനെ തോൽക്കാനാവില്ലല്ലോ വിശ്വജയ്ക്ക്: കണക്കു പരീക്ഷയെഴുതിയത് ആംബുലൻസിൽ കിടന്ന്

മണിമല ∙ വിശ്വജയ്ക്ക് ഇച്ഛാശക്തിക്കും എ പ്ലസാണ്. കാറപകടത്തിൽ പരുക്കേറ്റ വിശ്വജ എസ്എസ്എൽസി കണക്കു പരീക്ഷ എഴുതിയത് ആംബുലൻസിൽ കിടന്നായിരുന്നു. കണക്കിനൊഴികെ എല്ലാ വിഷയത്തിലും എ പ്ലസ് നേടി. മണിമല നമ്പുരയ്ക്കൽ എൻ.ടി.മധുസൂദനന്റെയും ആശ പി.നായരുടെയും മകളായ വിശ്വജ എൻ.മധു മണിമല സെന്റ് ജോർജ് ഹൈസ്കൂളിലെ വിദ്യാർഥിനിയാണ്.

പാലായിൽ ബന്ധുവീട്ടിലെ വിവാഹനിശ്ചയ ചടങ്ങ് കഴിഞ്ഞ് മടങ്ങുമ്പോഴാണ് ചാമംപതാലിൽ കാർ അപകടത്തിൽപെട്ടത്. മാതാപിതാക്കൾക്കും പരുക്കുണ്ടായിരുന്നു. സാരമായി പരുക്കേറ്റ വിശ്വജയ്ക്ക് എഴുന്നേറ്റു നിൽക്കാൻ സാധിക്കുമായിരുന്നില്ല. സഹായിയെ ഏർപ്പെടുത്തി പരീക്ഷ എഴുതിക്കുന്നതിന് അനുമതി വിദ്യാഭ്യാസ വകുപ്പിൽനിന്നു വാങ്ങാനുമായില്ല.   കണക്കിന് ബി പ്ലസ് ഗ്രേഡ് നേടി.