പെരുവണ്ണാമൂഴി ഡാമിന് സമീപത്ത് മണ്ണിടിച്ചിൽ

ചക്കിട്ടപാറ ∙ കുറ്റ്യാടി ജലസേചന പദ്ധതിയുടെ പെരുവണ്ണാമൂഴി ഡാം അണക്കെട്ടിനു സമീപത്ത് ശക്തമായ മഴയിൽ മണ്ണിടിച്ചിൽ. ഡാമിന്റെ ഇടത് ഭാഗത്ത് ഇൻസ്പെക്‌ഷൻ ബംഗ്ലാവിലേക്കുള്ള വഴിയുടെ മേഖലയിലാണ് മണ്ണിടി‍ഞ്ഞത്. സപ്പോർട്ട് ഡാം പ്രവൃത്തിയിൽ മണ്ണ് കൂടുതലായി നീക്കം ചെയ്തതാണു മണ്ണിടിച്ചിലിനു കാരണമെന്ന് പറയുന്നു. ശക്തമായ മഴ തുടർന്നാൽ ഐബിയിലേക്കു ഉയരത്തിലുള്ള നടപ്പാത പൂർണമായും നിലംപൊത്താൻ സാധ്യത ഉണ്ട്. ഡാമിലെ സോളർ ബോട്ട് സർവീസിന് ടൂറിസ്റ്റുകൾ സഞ്ചരിച്ചിരുന്ന ഈ മേഖല പൂർണമായും അടച്ചു. വിനോദ സഞ്ചാരികൾക്ക് ബോട്ടിങ്ങിനു വേണ്ടി ഐബിയുടെ മുൻവശത്തു നിന്നു താഴേക്ക് ബദൽ പാത ഏർപ്പെടുത്തി. ഡാമിന് ഭീഷണിയാകുന്ന മണ്ണിടിച്ചിൽ തടയാൻ അധികൃതർ അടിയന്തര നടപടിയെടുക്കണമെന്ന് ആവശ്യം ഉയരുന്നുണ്ട്.