കടുത്ത വരൾച്ച; കുടിവെള്ളം കിട്ടാതെ ഓളിയ്ക്കൽ

തിരുവമ്പാടി ∙ കടുത്ത വരൾച്ചയിൽ കുടിവെള്ളം ഇല്ലാതെ ഓളിയ്ക്കൽ പ്രദേശത്തെ ജനങ്ങൾ. ഈ പ്രദേശത്തെ വൈദ്യുത പദ്ധതി പ്രവൃത്തി നടക്കുന്നതുമൂലം പുഴയിലെ വെള്ളം മലിനമാകുന്നതാണ് പ്രശ്നമായത്.  ഓളിയ്ക്കൽ ലക്ഷം വീട് കോളനി, മധുര മൂല കോളനിയുടെ മുകൾ ഭാഗം, ഉറുമി എന്നിവിടങ്ങളിലാണ് കടുത്ത ജലക്ഷാമം അനുഭവപ്പെടുന്നത്. പൊയിലിങ്ങ പുഴയിൽ പണി നടന്നുകൊണ്ടിരിക്കുന്ന ഉറുമി –പൂവാറൻതോട്‌ ജല വൈദ്യുതി പദ്ധതികളാണ് പ്രദേശവാസികളെ ദുരിതത്തിലാക്കിയത്. പുഴയുടെ മുകൾഭാഗത്ത് നിർമാണം നടത്തുന്ന ഈ രണ്ട് പദ്ധതികളും പുഴയിലെ ജലം മലിനമാക്കുകയാണ്.

പാറ പൊട്ടിക്കുകയും മണ്ണ് എടുക്കുകയും ചെയ്യുമ്പോൾ പുഴയിലെ വെള്ളം കലങ്ങുന്നു. വേനൽക്കാലത്ത് പുഴയിൽ പൈപ്പിട്ട് വെള്ളം എടുക്കുകയായിരുന്നു പ്രദേശത്തുകാരുടെ പതിവ്. പുഴയിലെ വെള്ളം കലങ്ങി ഉപയോഗശൂന്യമായതോടെ ഇതു മുടങ്ങി.വല്ലപ്പോഴും പഞ്ചായത്ത് ലോറിയിൽ എത്തിക്കുന്ന വെള്ളം മാത്രമാണ് ആശ്രയം. ഗാർഹിക ആവശ്യങ്ങൾക്ക് ഇത് അപര്യാപ്തമാണെന്നു മാത്രമല്ല, പ്രധാന റോഡിൽ നിന്ന് അകലെ താമസിക്കുന്നവർക്ക് കിട്ടാൻ പ്രയാസവുമാണ്.