പെരുവണ്ണാമൂഴിയിൽ കാട്ടാന കൃഷി നശിപ്പിച്ചു

ചക്കിട്ടപാറ ∙ പഞ്ചായത്തിൽ ഏഴാം വാർഡിലെ പെരുവണ്ണാമൂഴി വട്ടക്കയത്ത് കൃഷി ഭൂമിയിൽ കാട്ടാന നാശം വിതച്ചു. തച്ചിലേടത്ത് ബിജുവിന്റെ കൃഷിയാണ് നശിപ്പിച്ചത്. വനാതിർത്തിയിലെ സൗരവേലി പ്രവർത്തിക്കാത്തതാണ് കാട്ടാന ശല്യം രൂക്ഷമാകാൻ പ്രധാന കാരണം. രാത്രി കൃഷിയിടത്തിൽ നിരന്തരം ഇറങ്ങുന്ന കാട്ടാന വൻനാശമാണ് ഉണ്ടാക്കുന്നത്.

ഫണ്ട് ഇല്ലാത്തതാണു സൗരവേലി പരിപാലിക്കാൻ തടസ്സമെന്നു പറയുന്നു. മാൻ, പന്നി, മുള്ളൻപന്നി, കുരങ്ങ് എന്നിവയും കൃഷി നശിപ്പിക്കുന്നുണ്ട്. മാൻ റബറിന്റെ തോൽ നശിപ്പിക്കുന്നത് പതിവാണ്. കുരങ്ങുകളും വ്യാപകമായി കൃഷി നശിപ്പിക്കുകയാണ്. വനം വകുപ്പ് അധികൃതരുടെ നിസ്സംഗതയ്ക്കെതിരെ  ജനങ്ങൾ പ്രക്ഷോഭം സംഘടിപ്പിക്കാൻ തീരുമാനിച്ചിട്ടുണ്ട്.