കോഴിക്കോട് ∙ ചാലപ്പുറം കനറാ ബാങ്കിൽ നിന്നു തിരുവനന്തപുരം ആർബിഐയിലേക്കു നൽകിയ നോട്ടുകളിൽ 8 കള്ളനോട്ടുകൾ കണ്ടെത്തി. 500 രൂപയുടെ നോട്ടുകളാണ് കെട്ടിൽ ഉൾപ്പെട്ടത്. സംഭവത്തിൽ കസബ പൊലീസ് കേസെടുത്ത് അന്വേഷണം ആരംഭിച്ചതായി അസി.കമ്മിഷണർ പി.ബിജുരാജ് പറഞ്ഞു. നേരത്തെ ഇതു സംബന്ധിച്ച് ആർബിഐ തിരുവനന്തപുരം മ്യൂസിയം പൊലീസിനു പരാതി നൽകിയിരുന്നു.

അവിടെ നിന്നും കൂടുതൽ അന്വേഷണത്തിനു കസബ പൊലീസിനു കൈമാറുകയായിരുന്നു. ഇന്നലെ കസബ പൊലീസ് കേസെടുത്തത്. നോട്ടുകൾ എണ്ണി തിട്ടപ്പെടുത്തി സീൽ ചെയ്തു സുരക്ഷിതമായാണ് അയച്ചതാണ്. നേരത്തെ അയച്ച നോട്ടുകൾ ഈ അടുത്തിടെയാണ് റിസർവ് ബാങ്ക് പരിശോധിച്ചത്. ഇതിൽ നിന്നാണ് വ്യാജ നോട്ടുകൾ ലഭിച്ചതായി പറയുന്നത്. കള്ളനോട്ടുകൾ എവിടെ നിന്നു കയറിയതെന്നാണു പൊലീസ് അന്വേഷിക്കുന്നത്.

English Summary: Indian fake currency