നാലുവരിപ്പാതയുടെ പണി തുടങ്ങിയതോടെ തിരുവങ്ങൂരിൽ നാലുപാടും കുരുക്ക്

തിരുവങ്ങൂർ∙ നാലുവരിപ്പാതയുടെ പ്രവൃത്തി ആരംഭിച്ചത് മുതൽ തിരുവങ്ങൂരിൽ ഗതാഗതക്കുരുക്ക്  രൂക്ഷം. സർവീസ് റോഡുകൾക്ക് വീതിയില്ലാത്തതും സഞ്ചാരയോഗ്യമല്ലാത്ത റോഡുകളുമാണ് കുരുക്കിന് കാരണം. കൊയിലാണ്ടി ദേശീയപാതയിൽ തിരുവങ്ങൂരിൽ മാത്രമാണ് നാലുവരിപ്പാതയുടെ പണി ഇഴഞ്ഞു നീങ്ങുന്നതെന്നു നാട്ടുകാർ പറയുന്നു. 

രാവിലെ തിരുവങ്ങൂർ ടൗണിൽ ലോറിയുടെ ടയർ പൊട്ടി മണിക്കൂറുകളോളം ഗതാഗത തടസ്സമുണ്ടായി. വാഹനങ്ങൾ പുതുതായി നിർമിച്ച റോഡിലൂടെ കടത്തിവിടാൻ ശ്രമിച്ചെങ്കിലും വീണ്ടുമൊരു ലോറി സർവീസ് റോഡിന് വശത്തെ ചളിയിൽ പൂണ്ടു ഈ റോഡിലും ഗതാഗത തടസ്സമായി. സർവീസ് റോഡിന് സമീപത്ത് ചെളി നിറഞ്ഞ നിലയിലാണ്.

പുലർച്ചെ കൊയിലാണ്ടിയിൽ നിന്നു വെങ്ങളം ദിശയിലേക്ക് സഞ്ചരിച്ച വാഹനം അപകടത്തിൽ പെട്ടിരുന്നു. റോഡിനു വശങ്ങളിൽ സ്ഥാപിച്ച ഡിവൈഡറിൽ ഇടിച്ചാണ് അപകടമുണ്ടായത്.  കാറിന്റെ മുൻഭാഗം തകർന്നിട്ടുണ്ട്.  കൂറ്റൻ കോൺക്രീറ്റ് ഭിത്തികൾ കൊണ്ട് സ്ഥാപിച്ച ഡിവൈഡറുകൾ രാത്രി  കാണാൻ പ്രയാസമാണ്.