ആഹ്ലാദത്തിലേക്ക് തുറന്ന് സർവകലാശാല പാർക്ക്

തേഞ്ഞിപ്പലം ∙ കാലിക്കറ്റ് സർവകലാശാലാ ക്യാംപസിൽ കോവിഡിനെ തുടർന്ന് 20 മാസമായി അടച്ച പാർക്ക് തുറന്നപ്പോൾ ആഹ്ലാദത്തോടെ വിദ്യാർഥികൾ. ഉദ്യോഗസ്ഥർക്കും ഇന്നലെ പ്രവേശനം അനുവദിച്ചിരുന്നെങ്കിലും എത്തിയവർ വിരളം. എന്നാൽ, വിദ്യാർഥികൾ ഏറെ എത്തി. ആട്ടവും പാട്ടുമായി അവർ പാർക്കിലെ സായാഹ്നം ആവേശകരമാക്കി.നിത്യേന വൈകിട്ട് 4 മുതൽ 6 വരെയാണ് പ്രവേശനത്തിന് അനുമതി.

പൊതുജനങ്ങൾക്ക് ശനി വൈകിട്ട് 4 മുതൽ 6 വരെയും ‍ഞായർ ഉച്ചയ്ക്ക് 2 മുതൽ വൈകിട്ട് 6 വരെയും പാർക്ക് സന്ദർശനത്തിന് അനുമതിയുണ്ട്. പൊതുജനങ്ങൾക്ക് എല്ലാ സായാഹ്നങ്ങളിലും പാർക്കിൽ പ്രവേശനാനുമതി നൽകിയുള്ള ആദ്യ ഉത്തരവ് പിന്നീട് അധികൃതർ പിൻവലിക്കുകയായിരുന്നു. സൗജന്യമാണ് പ്രവേശനം. പാർക്ക് കാവലിന് 2 സുരക്ഷാ ഉദ്യോഗസ്ഥരെ നിയോഗിച്ചിട്ടുണ്ട്.