സൂര്യകാന്തി മാറി; ഇനി ചെണ്ടുമല്ലിയാണ് താരം

എടക്കര ∙ ഗൂണ്ടൽപേട്ടിൽ ഇതുവരെ താരം സൂര്യകാന്തിയായിരുന്നുവെങ്കിൽ ഇപ്പോൾ ചെണ്ടുമല്ലിയാണ്. സൂര്യകാന്തി തോട്ടങ്ങളിൽ പൂക്കൾ ഉണങ്ങി തുടങ്ങിയപ്പോഴേക്കും ചെണ്ടുമല്ലി തോട്ടങ്ങൾ പൂത്തുലഞ്ഞു. ഇനി ഓണം കഴിയുന്നതു വരെ ചെണ്ടുമല്ലി തോട്ടങ്ങളിൽ പൂക്കളുടെ വസന്തമാണ്. കഴിഞ്ഞ ഒരു മാസത്തോളമായി സൂര്യകാന്തി‌ത്തോട്ടങ്ങളിലേക്കായിരുന്നു സഞ്ചാരികളുടെ ഒഴുക്ക്. ഇനി ചുരുക്കം ചില തോട്ടങ്ങളിൽ മാത്രമേ ഉണക്കം ബാധിക്കാതെ സൂര്യകാന്തി അവശേഷിക്കുന്നുള്ളു. പെയിന്റ് കമ്പനികൾക്ക് നൽകുന്നതിന് പുറമേ ഓണ വിപണിയും കണ്ടാണ് കർഷകർ ഈ സമയത്ത് പൂക്കൃഷി തുടങ്ങിയത്. ഗൂണ്ടൽപേട്ടിലും സമീപ ഗ്രാമങ്ങളിലും ‌ഹെക്ടർ‌ കണക്കിന് സ്ഥലത്താണ് ചെണ്ടുമല്ലി കൃഷി ചെയ്തിരിക്കുന്നത്.