അറിവിന്റെ ഗോപുരമായി വളർന്ന് വിരിപ്പാടം എഎംയുപി സ്കൂൾ

ആക്കോട് ∙ കാലങ്ങൾകൊണ്ട് ഒരു നാടിന്റെ അറിവിന്റെ ഗോപുരമായി വളർന്ന് വിരിപ്പാടം എഎംയുപി സ്കൂൾ. പാണക്കാട് ഹമീദലി ശിഹാബ് തങ്ങൾ പ്രസിഡന്റും പ്രമുഖ പണ്ഡിതൻ  മുസ്തഫ ഹുദവി മാനേജരുമായ ആക്കോട് ഇസ്‌ലാമിക്ക് സെന്ററാണ് ഈ സ്ഥാപനത്തെ നയിക്കുന്നത്. 1926ൽ ഓത്തുപള്ളിയായി തുടങ്ങിയ വിദ്യാലയം 1976ൽ യുപി സ്കൂളായി.  ലക്ഷങ്ങൾ ചെലവഴിച്ച് ആധുനിക സൗകര്യങ്ങളടങ്ങിയ ബഹുനില കെട്ടിടം പണിതു. സംസ്ഥാനത്തെ മികച്ച അധ്യാപകൻ, പിടിഎ പ്രസിഡന്റ്, മികച്ച സ്കൂൾ എന്നീ അവാർഡുകൾ സ്ഥാപനം നേടി.   

2019 - 20 കാലഘട്ടങ്ങളിൽ കോവിഡ് പ്രതിരോധ പ്രവർത്തനങ്ങൾ ഏറ്റെടുത്ത് നടത്തി. പഞ്ചായത്തിലെ മുഴുവൻ ആരോഗ്യ കേന്ദ്രങ്ങളിലേക്കും കവറുകൾ നിർമിച്ചു നൽകി.   2019 ൽ മികച്ച അധ്യാപികയ്ക്കുള്ള അവാർഡ് സ്കൂളിലെ  ഇ.പി.പ്രഭാവതി നേടി. 2022-ൽ സംസ്ഥാനത്ത് മികച്ച സ്കൂൾ , മികച്ച പിടിഎ കമ്മിറ്റി അവാർഡുകളും നേടി.  ജെആർസി, കബ് ബുൾബുൾ, ഹരിത ക്ലബ് എന്നിവ പ്രവർത്തിച്ചു വരുന്നു.  ഡോ. എ.ടി.അബ്ദുൽ ജബ്ബാർ (അക്കാഡമിക് കോഓർഡിനേറ്റർ) പിടിഎ ഭാരവാഹികൾ: ജുബൈർ (പ്രസി), അബ്ദുൽ ജബ്ബാർ , അനൂപ് (വൈ.പ്ര) , എംടിഎ ഭാരവാഹികൾ: ഹബീബ (പ്രസി),  നിഖില, അസ്മ (വൈ പ്രസി). പി.വർഗീസാണ് പ്രധാനാധ്യാപകൻ.