പോകുമ്പോൾ കുട്ടികൾക്ക് ഒരു പാർക്കിരിക്കട്ടേ...

കരുവാരകുണ്ട് ∙ സേവനം ചെയ്ത സ്കൂളിൽനിന്ന് പടിയിറങ്ങുമ്പോൾ കുട്ടികൾക്ക് കളിക്കാൻ പാർക്കൊരുക്കി പ്രധാനാധ്യാപിക. തുവ്വൂർ അക്കരപ്പുറം എഎംഎൽപി സ്കൂളിൽനിന്ന് 31ന് വിരമിക്കുന്ന പ്രധാനാധ്യാപിക എൻ.സി.ലീലാമ്മയാണ് 2 ലക്ഷത്തിലേറെ രൂപ ചെലവഴിച്ച് പാർക്ക് നിർമിച്ചത്.36 വർഷത്തെ സേവനത്തിനു ശേഷമാണ് ലീലാമ്മ വിരമിക്കുന്നത്. 2002 മുതൽ പ്രധാനാധ്യാപികയായി. 

5 അധ്യാപകരും 100 ൽ താഴെ കുട്ടികളുമാണ് സ്കൂളിൽ ആദ്യ കാലത്ത് ഉണ്ടായിരുന്നത്. ഇന്ന് 14 അധ്യാപകരും 400 കുട്ടികളും പഠിക്കുന്നു.കുട്ടികൾക്ക് സന്തോഷമുള്ള എന്തെങ്കിലും ചെയ്യണമെന്ന ആശയത്തിൽനിന്നാണ് ചെറിയൊരു പാർക്കൊരുക്കാൻ തീരുമാനിച്ചതെന്ന് ലീലാമ്മ പറഞ്ഞു.സ്കൂളിന്റെ ശതാബ്ദി ആഘോഷത്തോടൊപ്പം ലീലാമ്മയ്ക്ക് നാട്ടുകാരുടെ നേതൃത്വത്തിൽ യാത്രയയപ്പ് നൽകിയിരുന്നു.