താനൂരിൽ നിർത്തിയിട്ട കാറിന് പിന്നിൽ ബസ് ഇടിച്ചു

താനൂർ ∙ പരപ്പനങ്ങാടി റോഡിലെ ബസ് സ്റ്റോപ്പിനു സമീപം നിർത്തിയിട്ട കാറിന് പിന്നിൽ ബസ് ഇടിച്ച് ഇരു വാഹനങ്ങൾക്കും കേടുപാട്. കാറിൽ യാത്രക്കാർ ഇല്ലായിരുന്നു. രാവിലെ ചാലിയത്തുനിന്ന് തിരൂരിലേക്ക് പോകുന്ന സ്വകാര്യ ബസാണ് ഇടിച്ചത്. റോഡരികിലെ കൈവരിയിലേക്ക് ഇടിച്ചു കയറിയ കാറിന്റെ പകുതിഭാഗം ബസിന്റെ ഉള്ളിൽ കുടുങ്ങിയ നിലയിലായി. കാർ പൂർണമായി തകർന്നു. ബസിൽനിന്ന് ഇന്ധനം ചോർന്നത് പരിഭ്രാന്തി പരത്തി. പൊലീസും അഗ്നി ശമന സേനയും റോഡിൽനിന്ന് ഇന്ധനം വെള്ളം പമ്പ് ചെയ്ത് നീക്കി.