മാറഞ്ചേരി ∙ വരൾച്ച മുന്നിൽ കണ്ട്  മാറഞ്ചേരി മാറാടിയിൽ നെൽക്കൃഷി ഇറക്കാനുള്ള പമ്പിങ്ങിനു തുടക്കമായി. പൊന്നാനി കോളിലെ പുഞ്ച സീസണിനു മാറഞ്ചേരി പഞ്ചായത്തിലെ മാറാടിയിൽ ആണു  തുടക്കമായത്. മഴ കുറയുന്ന സാഹചര്യത്തിൽ വരൾച്ച ഉണ്ടാകുമെന്ന മുന്നറിയിപ്പിനെ തുടർന്നാണ് മാറാടിയിൽ തുലാം വർഷത്തിന് മുൻപ് കൃഷി ഇറക്കാൻ കർഷകർ തീരുമാനിച്ചത്.

പാടശേഖരത്ത് കെട്ടിനിൽക്കുന്ന വെള്ളം പമ്പ് സെറ്റിന്റെ സഹായത്തോടെയാണു വറ്റിച്ചെടുക്കുന്നത്. പമ്പ് ചെയ്യുന്ന വെള്ളം പുറം കോളിലേക്കാണ് ഒഴുക്കിവിടുന്നത്. 70 ഏക്കർ വരുന്ന പാടശേഖരത്ത് ഉമ നെല്ലാണ് കൃഷി ചെയ്യുക.‍ വെള്ളം കുറയുന്ന സാഹചര്യത്തിൽ അടുത്ത മാസം പകുതിയോടെ നടീൽ നടത്താനാണ് കർഷകരുടെ തീരുമാനം.