ഭർത്താവിനെത്തേടി തമിഴ്നാട്ടിൽനിന്ന് നിലമ്പൂരിൽ; അറിഞ്ഞതു മരണവാർത്ത

നിലമ്പൂർ ∙ മൊബൈൽ ഫോണിൽ ഭർത്താവിന്റെ ഫോട്ടോ കാണിച്ച് അധികൃതരുടെ മുൻപിൽ കണ്ണീരൊഴുക്കി നിന്ന മഞ്ജുള ഇന്നലെ  നിലമ്പൂർ ജില്ലാ ആശുപത്രിയിലെ കണ്ണീർക്കാഴ്ചയായി. ചൂരൽമല ശിവക്ഷേത്രത്തിലെ പൂജാരിയായിരുന്നു മഞ്ജുളയുടെ ഭർത്താവ് കല്യാണകുമാർ. തമിഴ്നാട് അയ്യൻകൊല്ലിയിൽനിന്നു ഭർതൃസഹോദരി ഭാരതിക്കൊപ്പമാണു മഞ്ജുള എത്തിയത്. തലേന്നു രാത്രി കല്യാണകുമാർ വിളിച്ചിരുന്നതായി പറഞ്ഞു പൊട്ടിക്കരഞ്ഞ ഇരുവരെയും സന്നദ്ധ പ്രവർത്തകർ ഏറെ പാടുപെട്ട് ആശ്വസിപ്പിച്ച് ഇരുത്തി. കാത്തിരിപ്പിനിടെ മേപ്പാടിയിലെ സ്വകാര്യ ആശുപത്രിയിൽ മൃതദേഹം തിരിച്ചറിഞ്ഞതായി വിവരം കിട്ടിയതോടെ ഇരുവരും അങ്ങോട്ടു പോയി.