ഉരുൾപൊട്ടൽ; ആനത്താര നഷ്ടപ്പെട്ട ആനക്കൂട്ടം പന്തല്ലൂരിനടുത്ത്

ഗൂഡല്ലൂർ ∙ പന്തല്ലൂരിനടുത്ത് ഏലിയാസ് കടയ്ക്ക് സമീപം പുൽമേടിൽ പുതിയ ആനക്കൂട്ടം. മുണ്ടക്കൈ ചൂരൽമല ഭാഗത്ത് ഉരുൾപൊട്ടലുണ്ടായതിന് ശേഷം പ്രധാനപ്പെട്ട ആനത്താര നഷ്ടപ്പെട്ടതോടെയാണ് ആനക്കൂട്ടം ഈ പ്രദേശങ്ങളിൽ ഇടത്താവളമാക്കിയത്. നിലമ്പൂർ വനത്തിൽ നിന്നുള്ള ആനക്കൂട്ടമാണ് ഇപ്പോൾ ഈ ഭാഗത്ത് നിലയുറപ്പിച്ചത്. മുൻപ് വല്ലപ്പോഴും വന്നു പോകുന്ന ആനക്കൂട്ടങ്ങൾ മാത്രമാണ് ഈ പ്രദേശത്ത് ഉണ്ടായിരുന്നത്. പ്രകൃതിദുരന്തം ഉണ്ടായതിനു ശേഷം ഈ ഭാഗത്തേക്ക് വ്യാപകമായി ആനക്കൂട്ടങ്ങൾ വന്നു തുടങ്ങി. സാധാരണ വന്നുപോകുന്ന ആനക്കൂട്ടങ്ങളല്ല ഇപ്പോൾ ഇവിടെ കാണുന്നതെന്ന് വനം വകുപ്പ് ജീവനക്കാർ പറഞ്ഞു. തുലാവർഷം കൂടി പെയ്തൊഴിഞ്ഞാൽ മാത്രമായിരിക്കും ആനക്കൂട്ടങ്ങളുടെ മടക്കയാത്ര ആരംഭിക്കുക. ആനക്കൂട്ടങ്ങൾ ഈ പ്രദേശത്ത് വ്യാപകമായ നാശനഷ്ടങ്ങൾ ഉണ്ടാക്കുന്നുണ്ട്. രാത്രിയായാൽ ഗൂഡല്ലൂർ - ചേരമ്പാടി റോഡിലേക്കിറങ്ങും. വാഹനങ്ങളുടെ നേരെ പാഞ്ഞടുക്കും.