ചമ്രവട്ടം പാലം: അപ്രോച്ച് റോഡ് നവീകരണം നാളെ തുടങ്ങും; ഗതാഗതത്തിന് ഭാഗികമായി നിയന്ത്രണം ഏർപ്പെടുത്തി

തിരൂർ ∙ ചമ്രവട്ടം പാലത്തിന്റെ അപ്രോച്ച് റോഡ് നവീകരണം നാളെ തുടങ്ങും. ഏറെ മുറവിളികൾക്കൊടുവിലാണ് റോഡ് നവീകരണം തുടങ്ങുന്നത്. മാസങ്ങളായി പാലത്തിലേക്കുള്ള ഇരുഭാഗത്തെയും അപ്രോച്ച് റോഡുകൾ പാടേ തകർന്നു കിടക്കുകയാണ്. കുണ്ടും കുഴിയും നിറഞ്ഞ റോഡ് ശരിയാക്കണമെന്ന് ആവശ്യപ്പെട്ട് വിവിധ സംഘടനകൾ പാലത്തിനു സമീപം വലിയ പ്രതിഷേധങ്ങൾ നടത്തിയിരുന്നു. ചില സംഘടനകൾ പാറപ്പൊടിയും മറ്റുമെത്തിച്ച് കുഴികൾ അടയ്ക്കാനുള്ള ശ്രമവും നടത്തിയിരുന്നു. റോഡുകൾ തകർന്നു കിടക്കുന്ന പ്രശ്നം ചൂണ്ടിക്കാട്ടി ‘മനോരമ’ വാർത്തകൾ നൽകിയിരുന്നു.

ഇതേ തുടർന്ന് നടപടി സ്വീകരിക്കാമെന്ന് അധികൃതർ അറിയിച്ചിരുന്നു. ഇതിന്റെ ഭാഗമായാണ് പ്രവൃത്തി തുടങ്ങുന്നത്. നവീകരണം നടത്തുന്ന സമയത്ത് പാലത്തിലൂടെയുള്ള ഗതാഗതത്തിന് ഭാഗികമായി നിയന്ത്രണം ഏർപ്പെടുത്തിയിട്ടുണ്ട്. തിരൂർ ഭാഗത്തു നിന്ന് വരുന്ന വലിയ വണ്ടികളും ചരക്കു വണ്ടികളും ബിപി അങ്ങാടി ബൈപാസ് വഴി കയറി കുറ്റിപ്പുറത്തെത്തി ദേശീയപാത വഴിയും പൊന്നാനിയിൽ നിന്നു വരുന്ന വാഹനങ്ങൾ ചമ്രവട്ടം പാലത്തിലേക്കു കടക്കാതെ ദേശീയ പാതയിലേക്കു കയറിയും വേണം യാത്ര തുടരാൻ.