ആഢ്യൻപാറ ചെറുകിട ജലവൈദ്യുത പദ്ധതി: ഉൽപാദനം കുറഞ്ഞു

നിലമ്പൂർ ∙ ആഢ്യൻപാറ ചെറുകിട ജലവൈദ്യുത പദ്ധതിയിൽ ഉൽപാദനം നാമമാത്രം. വേനൽച്ചൂട് കടുത്തു  കാഞ്ഞിരപ്പുഴയിൽ നീരൊഴുക്ക് കുറഞ്ഞതാണു കാരണം. ശക്തമായ വേനൽമഴ കിട്ടാതെ വന്നാൽ ഈ മാസം മധ്യത്തോടെ ഉൽപാദനം നിർത്തും. 1.5 മെഗാവാട്ടിന്റെ 2, അരമെഗാവാട്ടിന്റെ ഒന്ന് ജനറേറ്റർ ഉപയോഗിച്ചാണ് ഉൽപാദനം.

ഇപ്പോൾ അര മെഗാവാട്ടിന്റെ ജനറേറ്റർ മാത്രമാണ് പ്രവർത്തിപ്പിക്കുന്നത്. അതും കഷ്ടിച്ച് 4 മണിക്കൂർ മാത്രം. ആര്യാടൻ മുഹമ്മദ് വൈദ്യുതി മന്ത്രിയായിരിക്കെ 2015ൽ അന്നത്തെ മുഖ്യമന്ത്രി ഉമ്മൻചാണ്ടിയാണ് പദ്ധതി കമ്മിഷൻ ചെയ്തത്. വർഷകാലത്ത് കാഞ്ഞിരപ്പുഴയിലൂടെ ഒഴുകി എത്തുന്ന അധികജലം ഉപയോഗിച്ചു  വൈദുതി ഉൽപാദിപ്പിക്കുകയാണു ലക്ഷ്യം.